Shillong, Nohprah:
Ka Vi, kaba long ka shnat ai jingshakri ha ka liang ka Telecom ha India ka la ïatehlok bad ka EaseMyTrip.com, kawei na ki kompani ba ai jingshakri ha ka ban leh ïa ki jingdonkam ban leit jingleit, ha ka jingpyrshang ban nang kham pynbha shuh shuh ïa ki jingshakri sha ki nongpyndonkam. Ha kane ka jingïatehlok, ka EaseMyTrip kan wanrah ka jingtyrwa na ka bynta ki nongpyndonkam ïa ka Vi ïa ki jingmyntoi ba bun jait ha kaba ki book ïa ki tiket liengsuiñ, hotel, ki rel, ki bus bad ki taxi lyngba ka Vi App.
Ka jingthmu jong ka Vi ka long ban wanrah ki jingtyrwa ban kyntiew shuh shuh ïa ki lad ai jingshakri ki ban pynsuk ban ïoh ïa ka dor ka mur kaba biang, ki nong book kim hap ban siew eiei nalor ka bai tiket watla ki book ïa ka tiket na ka app bad kin ïoh ruh ki jingtyrwa kiba pynïoh nong ïa ki haba ki book ïa ki hotel hapoh la ka jong ka ri ne shabar ri hadien habud, ban leitkai, ki bus, bad ki taxi. Kum shi bynta jong kane ka jingïatehlok, ki nongpyndonkam kin ïoh ruh ïa ki jingmyntoi ba la pynkhreh kyrpang na ka bynta jong ki kum kiwei kiwei ki lad, ka jingpynsngewtynnad ïa ki bad kin ïoh ruh ïa ki Holiday Package ne ki jingpynkhreh ïa shibun kiei kiei kiba ki lah ban leh ha ka jingleitkai jong ki ha ka Vi App.
Ha ki por ban wan, ki nongpyndonkam kin ïoh ïa shibun kiwei pat ki jingmyntoi kum ka jingïoh ïa ki kali ban wan shaw bad leit on sha kad liengsuiñ khlem da hap siew pisa ha ka jingsiew kaba duna tam ïa ka bai booking. Haba kren shaphang kane ka jingïatehlok, u Rikant Pittie, Co-Founder, EaseMyTrip, u ong, “Kane ka jingïatehlok ba kyrpang jong ngi kan ïaid shaphrang na ka bynta ban ai ki jingshakri kiba kham kyrpang sha ki nongpyndonkam ia ka Vi bad pyntikna ba ka jingbook ïa ka tiket ban leit jingleit kan long kaba suk bad aram na ka bynta jong ki lyngba ka Vi app.”
