Shillong, Nohprah 12
Ka Regional Democratic Alliance (RDA) ba kynthup ïa ka United Democratic Party (UDP) bad ka Hill State People’s Democratic Party (HSPDP) ha ka Sngi Ba-ar ka la shim ïa ka rai ban ïatreilang ha ki 2 tylli ki ilekshon ban wan.
“Mynta ka sngi, ngi la sdang ka jingïakren halor ka ilekshon MP bad MDC ha kaba ngi la rai ba ngin ïalong lang kawei ban ïakhun ïa kine ki ilekshon ban wan,” la ong u Chairman ka RDA, Bah Metbah Lyngdoh haba kren sha ki lad pathai khubor hadien ka jingïalang.
Haba kylli halor u kyrtong, u la ong ba ka RDA shen kan sa shong biang ïa ka jingïalang halor kane ka bynta.
La ka kynhun ka la pynskhem ne em ïa u kyrtong MP, u Bah Lyngdoh u la ong, “Kam pat poi shata, ngi dang don hapdeng ki jingïakren bad ngin sa ïamir jingmut biang ïa kane ka mat ha ka jingïalang ban wan.”
Haba jubab, utei u nongïalam u la ong ba kumba ka long, kam don ka jingpan tiket hynrei ka dei tang lyngba ki jingïalang ïamir jingmut, bad ka jingïakren bad kito kiba ïadon bynta ha ka ban shim rai halor u kyrtong.
“Kum ka RDA ngim pat ïakren halor ka kyrteng jongno-jongno. Ngin sa mih shakhmat bad ka kyrteng ha ka por kaba biang bad ïa kane yn sa rah ha ka jingïalang ka ban sa long shen,” u la ong.
Katkum ka jingïathuh u Chairman, ka jingïakynduh jong ka RDA ha kane ka sngi ka long ka jingbteng ïa ka jingïalang ba la dep ha kaba la rai ba hadien ba la thung ïa u Chairman, Co-Chairman, Secretary bad Assistant Secretary, la rai ruh ban kynthup shuh sa 6 ngut ki dkhot na ka UDP bad 5 ngut na ka HSPDP.
“Mynta ngi la shong biang ïa ka jingïalang bad pyntip sha ka RDA ba na ka liang ka HSPDP, ki la kynthup bad jied ïa katto-katne ngut ki kyrteng – ïa ki 5 ngut ki dkhot jong ka bad na ka UDP, ngi la thung 6 ngut ban long ki dkhot jong ka RDA,” la ong u Bah Lyngdoh.
Kumba ka long mynta, baroh ki dkhot jong ka RDA ki don 15 ngut – 6 ngut kiba la kynthup shuh na ka UDP, 5 ngut na ka HSPDP nalor ki 4 ngut kiba la don lypa.
