Shillong, K’lyngkot 05
U Myntri ka tnat jngohkai uba peit ruh ïa ka tnat Lariti (Arts and Culture) ka Sorkar Jylla, u Bah Paul Lyngdoh u la khot la wer ïa baroh ban don ka jingïatreilang ha une u snem 2024 na ka bynta ban jingkiew sted ka Jylla ha bun ki liang bad leh bun kiei kiei namar ka Meghalaya ka don shibun ban pyni bad ban tyrwa sha ka pyrthei lyngba ka mariang, ka lariti, ki puriskam bad jingpawnam.
U Bah Paul u la pynpaw ïa kane haba ai jingkren lyngkot hadien ka jingplie ïa ki mattithaw pynsahman (mural) kiba la leh da ki barikor ha ka shlem treikam ka Deputy Commissioner ka East Khasi Hills district ha ka sngi Thohdieng.
Ïa kane la lamkhmat ban pynwandur da u samla Mario Pathaw ha ryngkat ka ST+ART India Foundation ha kaba ki dur kiba la dro ki batai shaphang ka tynrai ki nongshong shnong jong ki trai muluk ka Meghalaya nalor jinglong kyrpang ka mei mariang ha Meghalaya. Ha kane ka sngi la donlang ka DC ka East Khasi Hills district ka Kong RM Kurbah, nalor ki ADC bad kiwei kiwei ki ophisar, bad ki barikor kiba donbynta ban dro ïa kine ki jingpynsahnam.
Ha ka jingkren lyngkot, u Bah Paul u la ong ba kum kane ka jingdro kaba batai ïa ka tynrai jong ki nongshong shnong ka dei kaba kyrpang bad ka dei ka nuksa kaba ai mynsiem ba ki samla ka Jylla ki lah ban sei ïa la ki sap ha bynta ban dro ki jingdro bapher bapher kiba pynitynnad bad ïathuh ïa ka jinglong jingman jong kano kano ka jaka. U ai ka jingïaroh ïa u samla Mario Pathaw bad ka kynhun kiba la pynwandur ïa ki dur kiba la dro kiba da don da ka khana ban ïathuh bad khlem pep kan khring ïa ki nongwan kai ki ban sa sakhi ïa ka sap ki samla ba la dro ha ki kynriah ha kane ka nongbah.
U Bah Paul u la ong ba ka Meghalaya ka don bun ki briew kiba don ki sap bapher bapher bad ka Jylla ka don shibun ban sam bad tyrwa sha ka pyrthei bad donkam ban pynpaw ïa kita. U la ong ba tang ha u snem 2023, ka jingdon kiba wan jngohkai sha Meghalaya ka long kumba 15 lak ngut na kylleng ka pyrthei.
Une u Myntri u la ong ba ka kynhun kaba ïatreilang ka trei borbah ïa kaba lah ban leh da ka jingïatreilang.
U la ong ruh ba ka Jylla ka don kyrhai ban pyni naduh ka lariti, ka jinglong kyrpang ba shim jait na ka kmie, ka rukom bam bad ki jait jingbam, ki krem pubon ba itynnad bad bajrong bad ka lyer kaba dang khuid lada ïanujor bad kiwei pat.
U la ong ba ki don kiba kylli ïa u shaphang ki jaka sah kiba paw kiba la ïoh kyrteng katkum ki khlur kum ka Five Star ne Seven Star Hotel, hynrei u ong ba kaba kham kongsan ïa kiba wan shane ka long ba haba ki mih na ka jaka sah shabar ki ïohi kham bun ki klur kiba long ha ka jingitynnad ka mariang, ka lyer kaba khuid.
Kumta u la ong ba ka Meghalaya ka dei kawei na ki Jylla kaba bun ki kyntu ïa kiba wankai bad lyngba ka jingïatreilang jong baroh u snem 2024 un long u snem ka jingkiew sted ha bun ki liang da kaba pynkynmaw ïa ki kyntien kiba ong, “ka jingleit lynti kaba jngai da ki hajar mer, ka sdang na uwei u mawkyndon.”
La ïoh ruh ka jingkren na ka liang ka DC kaba la batai shaphang ka sienjam ban sdang ïa kane ka jingdro pynsahman lyngba u samla Mario Pathaw bad ka kynhun.
