Shillong, K’Lyngkot 11
Ka Assam kan dei ka jylla kaba lai hadien ka Uttarakhand bad Gujarat ban wanrah da ka aiñ rew (Bill) halor ka Uniform Civil Code (UCC) bad kan pyllait ïa ki jaitbynriew ‘riewlum na ki kyndon jong kata ka aiñ.
Ïa kane la pynbna da u Myntri Rangbah ka Assam, u Himanta Biswa Sarma, ha ka Sngi Palei ha Guwahati.
Ka UCC ka dei ka aiñ salonsar na ka bynta baroh ki nongshong shnong jong ka Ri bad ka dei ka aiñ ka bym shim na kano-kano ka niam ne jingngeit. Hapoh ka UCC, yn pynbeit ïa ki aiñ kiba ïadei bad ka jingïoh pateng, jingting khun bad kiwei.
“Ngi dang ap ïa ka aiñ rew jong ka Uttarakhand halor ka UCC, bad hadien ba la wanrah ïa ka, ka Assam kan sa pynbud, hynrei kin don shuh ki kyndon,” la ong u Himanta ha ka jingïakynduh bad ki lad pathai khubor.
U la ong ba ha ka UCC jong ka Assam, kin don ki kyndon bathymmai namar ka jylla ka ïakhun pyrshah ïa ka jingshongkha bad ki khynnah bad ka jingdon bun ngut ki kurim. Hynrei u la ong ba kane ka aiñ rew jong ka Assam kan pyllait ïa ki jaitbynriew kiba dei ki ‘riewlum.
“Ngin pule ïa ka aiñ rew jong ka Uttarakhand bad ngin sa peit la ngin lah ne em ban pan jingmut na ki paidbah hapoh ki ar-lai bnai ban wan,” u la bynrap. Hynrei u la ong ba lada mih ki kynrum-kynram, ïa kata yn sa ïakren bad ki ‘riew shemphang bad hadien kata yn sa pynjanai ïa ka aiñ rew.
“Baroh kan shong ha ki aiñ rew ban wanrah da ka Uttarakhand bad Gujarat, hynrei ka Assam kan dei ka jylla kaba lai ka ban wanrah da ka aiñ rew halor ka UCC,” la ong u Himanta.
Watla ka UCC ka dei ka mat kaba yn hap ban rai da ka Parliament, hynrei kano-kano ka jylla ka lah ban thaw aiñ tangba yn hap ïoh jingmynjur na ka President ka Ri India.
