Shillong, Ïaïong 22
Ka ïingbishar Meghalaya High Court ha ka sngi Ba-ar, kala pynwai noh ïa ka PIL ba tynjuh ïa ka jingtyrwa shna ïa ka Greenfield High Speed Corridor lyngba ka Ri-Bhoi District hadien ba ka Sorkar Jylla bad ki borkhmih ka Sorkar Pdeng kila kular ban bud pyrkhing ïa ki kyndon bad ki jingïada ïa ka mariang.
Ka Division Bench ba kynthup ïa ka Chief Justice Revati Mohite Dere bad Justice W Diengdoh kala pynmih ïa kane ka hukum haba shong bishar ïa ka PIL bala mudui da u Pynskhemlang Sohtun pyrshah ïa ka Sorkar Jylla, Deputy Commissioner ka Ri-Bhoi, NHIDCL, bad ka Ministry of Environment, Forest & Climate Change bad ka Road Transport & Highway.
U nongmudui u la pynpaw ïa ka jingsngewkhia halor ka kam thied jaka, ka jingktah ïa ka mariang bad ka jingïajan jong kane ka project bad ki jaka kyntang kynthup ïa u Lum Sohpetbneng.
Ha ka affidavit bala ai sha ka ïingbishar, ki nongshah mudui kila kyntait ba ïa ka jingthied jaka la leh hapoh ha National Highway Act, 1956.
“Ka borkhmih ïa ka jingthied jaka hapoh ka Act, u dei u Collector/Deputy Commissioner jong ki District,” ong ka affidavit ka NHIDCL haba bynrap ba u DC ka Ri-Bhoi u la pynlong ïa ka jingïasyllok kaba bniah bha bad ki Rangbah Shnong jong ki jaka ba shah ktah ha ka 11 tarik Nohprah 2024.
Ki jingeh bala pynsngew da ki kynhun ba shah ktah haba ïadei bad ka jingpynïaid surok lyngba ka tyllong um, ki lyngkha kba bad ki jaka rep la mynjur ban pyllait noh, ong ka affidavit haba pyntip ba ïa ka lynti ïaid la pynkynriah noh haba pynthikna ba ka tyllong um kan ym shah ktah bad ki lyngkha kba ruh kin duna kiba shah ktah.
Ha kawei pat ka affidavit, u Deputy Commissioner ka Ri-Bhoi, Abhilash Baranwal u la ong ba ka projek ka dei halor ka jingpyntrei ïa ka surok 4-lane highway corridor ba ïaid lyngba ki 18 tylli ki shnong ha Ri-Bhoi District kata naduh ka shnong Pyllun sha Lumsohphoh” ban pynkhlaiñ ïa ka jingpynïasoh hapdeng ka Shillong-Guwahati bad Silchar.
U la pyntip ba ka Jylla kala ïasyllok bad ki Rangbah Shnong bad ki Shnong ban pynbeit ïa ki jingsngewkhia ba kila pynsngew bad kala don ruh ka jingleit sorjamin lang ïa ki jaka ha ka jingïadonlang ki Rangbah Shnong na ka bynta ban pynshisha ïa ki jaka, ban ïakdew pud bad ban buh jingthoh ïa u pud u sam.
Halor ka jingthied jaka, ka affidavit kala pynshai ba “ki sienjam ba nyngkong kum ka sorjamin bad ka rai ïa ka lynti ïaid ka dei ka kam bala leh lypa da ka Sorkar hashuwa ka jingpynbeit ïa u pud jaka hapoh ka National Highway Act, 1956.
Haba pynbeit ïa ka jingsngewkhia halor u Lum Sohpetbneng, ka affidavit u DC ka ong “Ym don khyndiat ruh ka jaka bala ithuh kum ka jaka kyntang ka ban shah ktah ha kane ka projek bad ka lynti ïaid jong ka High Speed Corridor ka jngai kumba 500 meter na ki jaka kyntang”.
Haba khmih ïa ka affidavit bad ki jingbatai jong u DSGI, ka ïingbishar ka ong ba kam lap satia ïa kano kano ka nongrim ha kane ka PIL haba khmih ïa ka jingshisha, ba ki bor khmih kila pdiang bad mynjur ban bud ïa ki SOP…bad baroh ki kyndon ba hap pyndep. Ka ïingbishar ka pynpaw ba ki jingsngewkhia bala pynsngew da u nongmudui ki dei kiba ai jubab mynta ka sngi bad ba ki bor khmih kila kular ban shim ïa ka sienjam ban ïada ïa ka mariang, ki wahduid, ki jaka leh niam bad kiwei kiwei bad ba kin shim ruh ïa ki jingbit hashuwa ba kin pyntrei ïa ka projek bad ba kin ym ïaid lait ïa ki rule, ki kyndon ne ki jingbit.
Ka ïingbishar kala pynwai noh ïa kane ka mukotduma haba bynrap ba u nongmudui u long laitluid ban ujor thymmai ïa ka mukotduma lada mih kano kano ka daw ba thymmai hadien habud.
