Shillong, Ïaïong 22
U Symbud Myntri Rangbah ka Jylla ka tnad kam pohïing bad PWD (Roads & Buildings), Bah Prestone Tynsong ha ka Sngi Balang u la bthah ïa ka tnad Central Public Works Depart-ment (CPWD) bad ka Border Security Force (BSF) ba kin ai ïa ki No Objection Certificate (NOC) na ka bynta ban shna ïa ki surok PMGSY-III ha shi lynter khappud bar-ri bad ka Bangladesh.
Hadien ba pynïaid ïa ka jingïalang bad ki ophisar ka BSF bad CPWD, u Bah Prestone u la ong ba kawei na ki lynter ka don ha ka thaiñ Ranikor bad katei ka surok ka hap hapoh ka CPWD bad ka BSF.
“Ïa ka jingmang la ai na ka bynta ban shna thymmai ïa ki surok hynrei ngi donkam ïa ka ‘No Objection Certificate’ na ka CPWD kumjuh na ka BSF,” u la ong haba ïakren bad ki nongthoh khubor.
Na ka liang u Symbud Myntri Rang-bah u la ong ba sa kawei pat ka mat la pynpaw haba ïadei bad ka Ri-lum Garo ha kaba ki katto-katne ki lynter surok ki don shabar jong ka jingker sainar.
“Ki don ki bynta kiba ïaid shabar jong ka jingker sainar, ym hapoh ka jingker sainar. Sa shisien pat, kito ki bynta kiba don shabar jong ka jingker sainar, ka BSF ka sngew ba ngi donkam ban leh biang ïa ka jingpynbeit thymmai jong ka surok bad ban wanrah ïa ka hapoh ka jingker sainar namar lada ngi ïaid shabar, ka Bangladesh ka pyrshah bad kim shah ïa ngi ban shna ïa kino-kino ki surok ne ki jingtei.”
U Bah Prestone u la ong ba ïa kane ka mat la ïakren mynta ka sngi bad la ai jingbthah sha ka CPWD bad ka BSF ban ai ïa ka NOC kaba donkam khnang ba ka kam kan sdang noh mardor.
“Nga la ong ïa ki ban kin sngewbha ban ai ïa ka NOC khnang ba ngin lah ban sdang noh ïa ka kam namarba ïa ka surok la dep ban pynrung ha ka PMGSY-III. Ngi la shim ïa ka rai bad ma ki (CPWD bad BSF) ruh kin sa rah sha ka bor ba halor bad nangta ha kaba kut, kin sa ai ïa ki NOC sha ngi ban shna ïa ki surok,” u la bynrap.
