Nongpoh, Ïaïong 22
Ka Sorkar Jylla kala pynkhreh ban tei noh da ka Meghalaya House kaba thymmai ha Vellore, Tamil Nadu ban pynsuk ïa ki paidbah nongleit nongwan na ka Jylla, khamtam ïa kito kiba leit ban sumar nongpang ha katei ka jaka hadien ba ka Meghalaya House kaba rim kam long shuh ban maramot na ka daw jong ka jingtlor bad jingrim palat.
Ïa kane la pyntip da u Myntri ka tnad General Administration Department (GAD) ka Jylla, u Bah Sosthenes Sohtun haba kren sha ki lad pathai khubor ha ka janmiet ka sngi Balang ha Nongpoh. U la ïathuh ba kane ka sienjam ba la shim da ka Sorkar ka dei hadien bun na ki nongmihkhmat ki la mih shakhmat ban pynpaw ïa ka jingsngewkhia halor ka jinglong jingman jong ka Meghalaya House kaba don ha Vellore.
U la ïathuh ruh ba ïa katei ka Meghalaya House kaba thymmai yn tei ha kajuh ka jaka jong ka Meghalaya House kaba rim ha ka jinglut kaba T.20 klur tam bad kan don kumba palat 50 tylli ki kamra bad pyntip ruh ba kumba long mynta ka Sorkar ka dang pynkhreh bad hadien ba la dep ban pynbiang ïa ki jingdonkam baroh, ka Sorkar kan sa khot tender noh na ka bynta kane ka kam.
Halor ka jingtyrwa jong u MLA ka North Shillong, u Bah Adelbert Nongrum ban ai kumba T.50 lak na ka bynta ban maramot ïa ka Meghalaya House kaba rim, u Bah Sosthenes Sohtun u la pynshai ba ka Sorkar ka sngewthuh ïa ka jingsngewkhia jong ki nongmihkhmat halor kane bynta, hynrei hadien ka jingkhmih bniah, ka Sorkar kam lah satia ban pdiang katei ka jingtyrwa u Bah Adelbert Nongrum naba ka long pyrshah ïa ki kyndon treikam jong ka skhim MLA kaba dei katkum ka Special Urban Works Programme (SUWP) bad ïa kane ka bynta, ka Sorkar kala dep ruh ban ai da ka jingthoh sha utei u MLA ba katei ka skhim ym lah ban ai sha kiwei pat ki Jylla naba la mang ïa ka na ka bynta jong ka roi ka par jong ka konstitwensi.
Haba kylli pat haei ba ki paidbah kiba leit sha katei ka jaka kin ïoh ban sah katba ka jingtei ïa ka Meghalaya House ka dang ïaid shakhmat, u Bah Sosthenes Sohtun u la ïathuh ba ka Sorkar kala shimkhia ruh halor kane ka bynta da kaba ïathuh ba kan shim wai ïa kawei ka ïing ha katei ka jaka kaba ki paidbah na ka Jylla ki lah ban sah tad haduh ba la lah ban pyndep ïa ka Meghalaya House kaba thymmai kaba la antad yn lah ban pyndep kumba 2 snem tam eiei.
