Shillong, Ïaïong 22
U MDC ka JHADC ka VPP na War Central u Bah Jamshaphrang Pohtam u la ong ba ki trok kit dewïong ki kylla man ka por ha surok bah bad ki krem dewïong ki twa man ka por hynrei ban tih dewïong ki paidbah ym shah.
U la ong ba ki nongñiah trok ka Bri u Hynñiewtrep ki hap dem khohsiew hakhmat ki kompeni pynmih dewbilat ha Rilum Jaiñtia namar ki nongkhaïi na Assam ki la phah ïa ki trok ban kit dewbilat.
Kane ka jingkren u Bah Jamshaphrang ka dei ha ka jingïalang paidbah ka VPP ba la pynlong ha Motphran ha ka sngi Balang.
U la ong, kane ka Sorkar ka kwah ban pynsngewbha ïa kita ki briew kiba don ka kyrdan “high level” katba ïa u paidbah ki pynjynjar.
U la ong hadien ba la dep shah khang u dewïong, ïa u mawshun la klun da ki kompeni pynmih dewbilat hynrei kine kim shym la ai jingmyntoi ïa ki paidbah ka Jylla.
U la ong ki don haduh phra tylli ki kompeni pynmih dewbilat ha Jaiñtia hynrei kim ai jingmyntoi ïa ki paidbah namar mynta ki la sdang ban leh benami namar ki siew ïa ki trai shnong da ka pisa da kaba ki shu wan soi kyrteng hynrei ïa ka kam jong ki la trei da ki bar jylla.
