Shillong, K’lyngkot:
U MLA barim ka Sohra bad MDC ba mynta, Bah Titosstarwell Chyne, u la ong ba ka jingpynkhyllem noh ka sorkar jylla ïa ka Mawmluh Cherra Cement Limited (MCCL) ka daw baroh ka dei ka jingbymdon jingkitkhlieh kiba don ha ka bor bad ka jingbym lah pynïaid ka Management.
Haba ïakren bad u Bah Titosstarwell u la ïathuh ba ïa ka MCCL la tei ha ka por ba dang synshar ka sorkar Assam bad ha kito ki por ki phareng ki la thied ïa ki tiar naduh Yugoslavia kaba ki khot ka ‘wet process’. Kumta namar ba ki mashin ki la sdang rim ka sorkar jong u Dr.DD Lapang ha u snem 2006 ka la buh mawnongrim ban tei noh da kaba thymmai kaba khot ka ‘dry process’.
U la ïathuh ba katba ki mashin kiba rim ki dang ïaid haduh u snem 2015 kaba mih na kaba rim la pynlut beit ïa ka jingshna ïa kaba thymmai.
“Ka jingai pisa kaba khatduh na ka sorkar jylla ban shna ïa kaba thymmai ka dei ha ka por jong u Dr. Mukul Sangma kaba u la ai haduh T.87 klur, ha kito ki por nga dang dei u MLA ka Sohra” u la ong.
Nalor nangta, u Bah Titosstarwell u la ïathuh ba nalor ka pisa kaba la ai da ka sorkar, la shim ram bad la sei ruh wat ïa ka pisa (deficit) bad ki jingdon jingem jong ka MCCL ban pyndep ïa kaba thymmai hynrei baroh kim shym la urlong kat haduh ban khyllem syndon.
“Nga la dep kren ha ïingdorbar balei ban thied lypa ïa ki tiar naduh u snem 2008 haduh 2018 khlem lah ban pyndonkam la shu buh beit shabar kat haduh ba ki la sniew lut” u la ong.
Shuh shuh u Bah Titosstarwell u la ïathuh biang ba ka Management ha kito ki por ka aidaw ba dei bym don kiba tbit ban pynïaid ïa ki mashin kiba thymmai hynrei u la ai jingmut ba dei ban phah ïa ki briew napoh ka jylla ban leit shah hikai pyntbit tangba kim shym la leh.
U la ïathuh ba ha kito ki por ki batai ba lada dep ka ‘plan’ kaba thymmai yn pynmih dewbilat haduh 600 ton shisngi hynrei kat dang mih ki sngi ka ‘plan’ kaba rim ka poi tang 200 ton shisngi bad khyllem syndon bad kaba rim bad kaba thymmai.
“Haba nga la shah rem noh ha u snem 2018, ym don shuh ban buddien ïa ka kam jong ka MCCL kat haduh ban khyllem syndon” la pynpaw u Bah Titosstarwell.
U Bah Titosstarwell kum u nongmihkhmat u la pynpaw ka jingpangnud ban ïohi ba ka MCCL kan khyllem noh namar kane kan ktah ïa u khiewja jong kito kiba ju kamai jakpoh ha kine ki snem kiba la dep noh.
