Shillong, K’lyngkot 18
Ka jingsngewtynnad ki paidbah ban sngap bad ban tem ïa ka jingrwai ‘Kynding’ ba la rwai da ka Jessie Lyngdoh bad ka kynhun ‘Ka Sur Na Nongkyndong’ ka la pynlong ïa ki paidbah ban kin khot beit ïa kane ka kynhun tem ban rwai bad ban tem haba don ki jingkhawai ïathoh shongkurim bad kiwei kiwei.
Kane ka jingrwai (Kynding) ka la jan dap 2 million view ha youtube kaba la pyllait naduh ka 1 tarik u Nohprah 2023 ha Jessie Lyngdoh YouTube Channel namar ka jingsngewtynnad bad bang ka sur rwai ba rwai da ka Jessie Lyngdoh bad u Bah Waibha Nongrum ryngkat ka jingtem na ka kynhun ‘Ka Sur Na Nongkyndong’ kaba dei na Lynshing, Mawkynrew Block, East Khasi Hills District.
Ka khana kaba sngewtynnad shaphang kane ka kynhun tem ha ka jingïaid lynti ban ïoh rwai ha kane ka jingrwai ka dei namar ka Jessie Lyngdoh kaba don lang haba ki rwai ha Evening Club ha ki snem ba la dep, kumta ka la wad ban ïa rwai lang ha kane ka jingrwai.
Ban tip kham bniah shuh shuh ïa ka jingïoh lad ban rwai ha kane ka jingrwai, U Nongsaiñ Hima u la ïoh ban ïakren kyrpang bad u nongrwai ba hakhmat jong kane ka kynhun tem kata u Bah Waibha Nongrum ryngkat ka jingïadonlang ki nongtem kiba ïeng lang ha syndah.
U Bah Waibha u la ïathuh ba la ïoh ban rwai bad ak ha kane ka music video ‘Kynding’ ka dei ka jingwan wad hi ka Jessie ïa ki haduh ha shnong.
U la ïathuh ba ïa kito ki jaka ba la ring hajrong lum la ringdur hajan ka shnong Lynshing.
U la batai ba ka jingmut ‘Kynding’ ka pynkynmaw ïa ki por ba mynshwa haba pynshad ïa ki khun haba ki dangrit.
Shuh shuh u la batai ba kito ki kyntien ba la rwai, “Kampher ka patlun ka jot namar dik-dik ka kyndeh ban ïohi ïa phi” kane ka pynkynmaw haba ïohi ïa ka ‘thei bhabriew ka mynsiem ka kyndeh wat la phong patlun ba jot ruh.
U Bah Waibha u la ïathuh ba shwa ban mih ka jingrwai ‘Kynding’ ki la don palat 372 tylli ki jaka ba la shah khot ban rwai bad mynta namar ba la mih sa kane ka jingrwai (Kynding) la nang bun shuh shuh ban khot rwai.
Nalor kata, u la ïathuh ba ki nongtem na ka kynhun ‘Ka Sur Na Nongkyndong’ ki dei na hynñiew tylli ki shnong; kita ka Lynshing, Khwat, Nongpyrdi, Mawlong, Mawjatap, Mawsna bad Khliehsem.
“Haba ngi thaw ïa kane ka kynhun rwai ka jingmut ban rwai jingrwai niam hynrei mynta mar shu mih ka jingrwai ‘Kynding’ haba ki paidbah ki phah rwai, ngi hap rwai beit” u la ong.
U la ïathuh haba rwai kam dei ban pynkmen ïalade hynrei ban pynkmen ïa kiba sngap.
