Shillong, K’Lyngkot 18 (UNI)
Ka Voice of the People Party (VPP) kan ïaid beit shakhmat ban leit shong hakhmat ka Main Secretariat ha ka Sngi Thohdieng ban dawa na ka sorkar ban thung kam biang ïa ki lai ngut ki heh ophisar ka Lokayukta kiba la shah weng kam.
Hynrei ha ka Sngi Palei, ki bor distrik ka East Khasi Hills ki la thoh sha u President ka VPP, u Bah Ardent M Basaïawmoit, bad sha u General Secretary, u Dr Ricky A.J. Syngkon, haba ki la kyntu ïa ki ban ym pynlong ïa katei ka jingïakhih namar ka jingïalang ba ar sngi jong ka North Eastern Council (NEC) ka ban sdang lashai ka sngi ha nongbah.
Ha kane ka jingïalang jong ka NEC, u Myntri Korbar Ri, u Amit Shah, un pynïaid ïa ka jingïalang ha kaba yn wan ïashim bynta da ki Lat bad Myntri Rangbah jong ki jylla ka thaiñ Shatei Lam Mihngi ha ryngkat ki heh sorkar.
“Ngi la rai ban leit shong beit hakhmat ka Main Secretariat lashai ka sngi tad haduh ba ka sorkar kan thung biang ïa kito ki heh ophisar ka Lokayukta kiba la shah weng kam hadien ba ki la lap ïa ki kam bamsap bamngem ha GHADC (Garo Hills Autonomous District Council),” la ong u Bah Ardent.
Haba kyntait ba u la ïoh pdiang ïa ka shithi na ki bor distrik ha kaba la kyntu ïa u ban ym pynlong ïa ka jingleit shong hakhmat Secretariat, u Bah Ardent u la ong, “Ngin sa weng ïa ka jingïakhih tang lada ka sorkar kan thung kam biang ïa ki lai ngut ki ophisar ka Lokayukta. Ka shong ha ka sorkar ba kan rai.”
Ha ka shithi sha u Bah Ardent bad Dr Syngkon, ka District Magistrate ka East Khasi Hills, ka Kong RM Kurbah, ka la pyntip sha ki halor ka jingdon jong ka jingïalang ka NEC, bad ka la ong, “…ka long kaba donkam ïa ki nongshong shnong ka Meghalaya ban pynthikna ba kan don ka shongsuk shongsaiñ namar kum kine ki jait jingïalang ki ai ïa ka khubor halor ka jingdon ka jingsuk bad ki pyni ïa ka jingïaid shaphrang ka jylla.”
Lah ban kdew ba ka sorkar ha u bnai Nohprah ka la weng kam ïa baroh ki ophisar ka Lokayukta kiba don bynta ha ka jingtohkit. Kine ki kynthup ïa u Bah Jainal Rymmai, uba long u Director ka tnat Inquiry & Prosecution, bad ïa u Bah Rymphang Pde bad Anil K Sangma, kiba dei ki ophisar ba pynlong ïa ki jingtohkit.
Ka sorkar ka la thung noh da kiwei pat ki ophisar ha ka jaka jong kitei ki lai ngut, hynrei ka VPP ka la dawa ba dei ban thung biang da kitei ki lai ngut.
