Shillong, K’lyngkot 19
U Myntri ka Sorkar Pdeng uba peit ïa ka tnat Korbar Ri, u Amit Shah u la ong ba ka India kan sa kynjoh sha ka ïoh ka kot kaba kot sha ka 5 trillion dollar bad ka thaiñ Shatei Lam Mihngi ruh ka dei ban don ka thong ban ai bhah lang kaba heh ha kane ka bynta bad ynda ka India ka la lah ban kiew bad shaniah halade ha u snem 2047, ka thaiñ Shatei Lam Mihngi ruh kan long pura ka thaiñ kaba kiew shaphang bad lah ban shaniah halade.
U Shah u la kren ïa kane ha ka plenary session kaba 71 jong ka North Eastern Council (NEC) ha Shillong ha kaba u la ïaroh ïa ka Sorkar Pdeng hapoh ka jingïalam u Myntri Rangbahduh ka ri, u Narendra Modi ba u la leh shibun kiei kiei na ka bynta ka Ri bad ka thaiñ Shatei Lam Mihngi.
Ha kane ka plenary session, ki Myntri Rangbah bad ki Lat jong ki Jylla bapher bapher ki la wan ban ïashimbynta ha kane ka jingïalang ka NEC.
U Shah u la ong ba ki 10 snem ki la long ka por jong ka ksiar na ka bynta ka thaiñ Shatei Lam Mihngi hapoh ka jingïalam u Narendra Modi.
U la ong ba ka Sorkar Pdeng lyngba u Modi ka la bud ïa ka rukom treikam kaba long Act East, Act Fast, Act First Policy bad ka North East ka long kaba kiew shaphrang da kaba iehnoh ïa ki kam umsnam bad ka bynta jong ka NEC ruh ka la nang kiew hapoh jong ka Act East Policy.
U Shah u la ong ba ki kam pynroi bad ka suk ka saiñ ki la wan lang ban pynurlong ïa ki soskular ïasuk, bad kumba 73 na ka 100 ki kam umsnam ha North East ki la duna ha ka por jong u Modi.
U Shah u la ong ba ki kam jingtei jingshna ki la pynduna ïa ka jingjngai hapdeng ka North East bad Delhi.
U Shah u la kyntu ruh ïa ki Jylla ha North East ban pynduna ïa ka jingpynlut pisa kham bun ban ïa ka jingïoh.
Shuh shuh u la ong ba kane ka thaiñ ka donkam ban leh eiei ban thaw kam lyngba ka jingpynmih ïa ki tiar kiba shna hi, dohkha, ka dud, pylleng bad kiwei kiwei nalor ka jingshimkhia ban pyllait na u drok bad jingshlei um bad sumar ban pynneh pynsah ïa ka um da kaba ïatreilang bad ka NESAC.
Une u Myntri Sorkar u la kren shaphang jinghiar ki kam umsnam bad pyntriem ha thaiñ Shatei Lam Mihngi namar hapdeng u snem 2004 bad 2014, ki la don haduh 11,121 tylli ki jingjia ïaumsnam bad la hiar sha ka 3,114 naduh u snem 2014 bad 2023.
U la ong ruh ba ha Assam bad Manipur, 75 na ka 100 ki jaka la lah ban pyllait na ka jingpynjari ïa ka aiñ Armed Forces Special Powers Act (AFSPA) haduh u snem 2018.
U Shah u la kren shibun ki kam pynroi kiba la leh ha kine ki 10 snem ha ka thaiñ Shatei Lam Mihngi naduh ki surok, kad liengsuiñ bad ka jingwan jngoh ki Myntri Sorkar Pdeng ruh ka la long kumba 500 sien bad tang u Myntri Rangbahduh ka ri u la wan kumba 50 sien sha ka thaiñ Shatei Lam Mihngi.
