Shillong, K’Lyngkot 19
Ha kawei ka jingjia ha ka thaiñ khappud India-Bangladesh ha South West Khasi Hills, ki BSF ki la hap ban siat ar kuli sha suiñ ban pynpra ïa kumba 50-60 ngut ki suba nong Bangladesh kiba la wan ban kit shini ban khaïi be-aiñ na India sha Bangladesh.
Katkum ka khubor na ki pulit, la ong ba u Company Commander, G-Company, 1st Battalion BSF, Bagli Border Outpost, South West Khasi Hills, u la ujor ba ha ka 13 tarik Kyllalyngkot ha ka por kumba 6:30 janmiet, ki BSF ki la ïohi ïa ka jingïaid jong kumba 50-60 ngut ki suba nong Bangladesh kiba lah ban dei ki runar ne kiba donkti ha ki kam khaïi mar be-aiñ.
La ong ruh ba kitei ki suba nong Bangladesh ki la rah da ki tiar pynmynsaw bad ki dieng. Nalorkata, la ong ba ka jingwan rung sha u pud u sam jong ka India ka long ban wan kit ïa ka shini kaba la thmu ban khaïi be-aiñ na India sha Bangladesh.
Shuh shuh la ong ba kita ki suba nong Bangladesh ki la thombor ïa ki BSF bad ki la pyrshang ruh ban knieh ïa ki tiar siat na ki. Ha kane ka por, utei u Company Commander u la ong ba u la hap ban siat ar kuli sha suiñ na ka tiar siat jong u khnang ban pynher krad noh ïa kitei ki suba nong Bangladesh.
