Mawkyrwat, K’Lyngkot 24
Uwei u rangbah uba la tip kyrteng kum u Bah Petar Sohphoh, 40 snem ka rta na ka shnong Pyndengrei ha West Khasi Hills District, u la khlad noh hashen hadien ba ka kali kaba u ñiah ka la thung baji ha kawei ka muri ha ka shnong Sahsniang, South West Khasi Hills District.
Katkum ki tyllong khubor na ki pulit la ïathuh ba katei ka jingjia hap jong katei ka kali kaba don ïa u registration number ML10-7040, ka la jia ha ka step jong ka 24 tarik mynta u bnai ha ka surok Intermediate Nongstoiñ, Wahkaji ha ka por kumba 5:30 eiei mynstep.
Ka khubor na ki pulit ka la ïathuh ruh ba ïa katei ka kali la ñiah da u Bah Petar Sohphoh kaba mih na Nongstoiñ ban leit sha Mawkyrwat.
Haba ïadei bad katei ka jingjia, ki pulit ka Mawkyrwat ki la pynkit noh ïa ka met jong utei u rangbah sha CHC Mawkyrwat ban pyndep ïa ka post mortem bad ha kaba ïadei bad katei ka jingjia ki pulit ki dang pynlong ïa ka jingtohkit.
