Shillong, Nailur 08
U Bah Mariahom Kharkrang, IPS ophisar barim uba bat teng kum u Superintendent of Police ka East Khasi Hills u la phah ka khubor sha ki samla bad ki longïing namar ka long shisha ka khubor kaba sngewtriem ba ka para kynthei kam shngaiñ shuh ban sah ha ïing lada don u hynmen shynrang uba kyrni dih drok.
Ïa kine ki kyntien u la pynpaw haba kren kum u symbud kongsan ha ka jingleh burom ïa ki samla pule kiba pyndep ïa ka degree jong ka Shillong College ha ka Sngi Saitjaiñ ka 7 tarik Nailur 2024 kaba la long ha katei hi ka kolej.
U Bah Kharkrang u la kyntu ïa ki samla pule ba dei ban ong ‘say no to drug’ namar ka imlang ka sahlang kan sa jot lada baroh ki briew ki la kyrni ïa une u jingdih pynbuaid.
U la pynkynmaw haba u dang don ha ka kam kum u pulit ophisar, ka kmie kaba kha ba pun ka la wan ban pynbor ban ai ejahar pyrshah ïa u khun ba un shong ha patok namar ka jingkyrni dih drok.
U la ong ba phi lah ban mutdur ba ka para ka hap ban phetrieh na la u hynmen ha jaka ba un ïada. U la ïathuh biang ba ka para ka ong ïa ka kmie, mei ngam nud ban sah marwei ha ïing lada don i Bah.
Katba u MLA ka Sohra Bah Gavin Mylliem u la ïathuh ba u la pyndep ïa ka jingpule na St. Anthony’s College, 12 snem mynshwa hynrei haba u ïeng mynta ban long kum u kongsan ha ka jingpynkup burom ïa ki samla pule, u sngew kumba u pyndep ïa ka ‘graduate’ na Shillong College.
U Bah Gavin haba u shim kum u kongsan u la ïoh ban ai syrnot sha ki samla pule kiba wan shakhmat ha ki eksam bapher bapher kiba la pyndep ïa ka graduate mynta u snem 2024 na Shillong College.
Kane ka jingleh burom ïa kiba pyndep ïa ki kyrdan bapher bapher ne ka Graduation Ceremony 2024 kan dei ka sien kaba nyngkong ïa ka Shillong College mynta u snem naduh ba la seng ïa kane ka kolej ha u snem 1956. U Bah Gavin u la ong ba mynshwa kam don kum kane ka jingpynkup burom hynrei mynta haba u ïeng ha rynsan ban phong ïa ka tupia bad ka sopti u sngew kumba u pyndep ïa ka jingpule na Shillong College.
Ha kajuh ka por u la pyntip ba ka jingtei ïa ka Shillong College ha Laitlyngkot kan sa sdang noh shen hadien ba ka jingtyrwa ba la phah sha ka sorkar.
