Shillong, Nailur 08
Ka Meghalaya Government Drivers Welfare Association (MGDWA) ha ka Sngi Saitjaiñ ka la pynlong ïa ka Blood Donation Camp ne ka jingnoh synñiang ïa ka snam ha Pasteur Hills Blood Bank, Shillong.
Ha kane ka prokrma ki la don 80 ngut ki dkhot jong ka MGDWA kiba la mih shakhmat ban noh synñiang ïa la ka snam hynrei kiba la ïoh ban ai snam ki long tang 32 ngut.
Kane ka jingwan shakhmat jong ki dkhot katei ka synjuk ban noh synñiang ka snam ha katei ka prokram kaba la pynlong da ka MGDWA Health Department Unit jong ka Synjuk, kaba long ruh ka prokram ba la pynïaid shakhmat kum shi bynta jong ka jingrakhe ïa ka jingdap 50 snem da ka association.
Ka Kong VR Syiem kaba dei ka Secretary jong ka sorkar jylla ka la ïadon lang kum ka Kongsan, ryngkat bad ka Director of Health Services (MI) Dr FV Kharshiing bad Director of Health Services (Research) Dr W Kharlukhi kila long kum ki kongsan symbud bad ka Dr C Budnah kaba peit ïa ka Blood Bank, Pasteur, Lawmali, ha kaba la pynkup burom ïa ki dkhot jong ka MGDWA kiba la noh synñiang ïa ka snam ka jongki khnang ba kan long ka jingïarap ïa kiwei pat kiba donkam kyrkieh ïa ka snam ha ka por ba ai ïa ka jingsumar.
Ha kane ka jingïalang la ïadonlang ruh ki nongïalam ka MGDWA kiba kynthup ïa u President u Bah C Syiemlieh bad u General Secretary ka MGDWA u Bah P Nongkynrih bad kiwei kiwei ki nongïalam bad ki dkhot jong ka Association.
