Nongstoiñ, Nailur 08
Haduh arsien-arwat, ka la don ka jingshah syntiat jong ka ïing u Syiem ka Hima Nobosohphoh ha ki briew kiba kah durkhmat la suba jur ba ki lah ban dei ki runar kieng atiar bad la suba jur ruh ba imat kane ka jingthmu ka lah ban dei ba ki don jingmut sniew eiei pyrshah ïa u Syiem.
Halor kane, ki kur ki kha jong u Syiem Kawangbor Syiemïong, Syiem ka Hima Nobosohphoh, kynthup ïa ka ïing bad ki hynmen ki para jong utei u syiem ki la pynpaw ka jingsngewkhia kaba jur hadien ba ki briew kiba la kah dur khmat ki la leit ban syntiat ïa ka ïingsah jong u haduh arsien-arwat.
La ong ba ka sien ba nyngkong ba kine ki briew kah durkhmat ki la wan syntiat ka dei ha ka 26 tarik u Nailar 2024, ha kaba ar ngut ki briew kiba la kah durkhmat bad kiba la kieng da ki suloi ki la wan ban ïeng hajan ïing jong u. Nangta, ha ka 3 tarik mynta u bnai pat la wan biang kine ki briew ba kah durkhmat hajan ïing jong u Syiem ha kaba la suba ruh ba ki lah ban dei kijuh ki briew kiba la wan ban syntiat biang. Katkum ka jingïathuh jong ki bahaïing la ong ba katei ka jingjia ha ka 3 tarik ka dei kaba la jia ha ka por kumba 5 baje janmiet, ha kaba ha katei ka sngi uwei na ki samla shnong ruh u la ïohi ïa kita ki briew hynrei haba u la pyrshang ban buddien ruh um nud than namar u don marwei bad la ong ba tang hadien katto-katne por kita ki briew ki la phet noh bak sha khlaw.
Ka tyllong khubor ba la ïoh lum la ïathuh ba haba ïadei bad kitei ar tylli ki jingjia, ki kur ki kha ki la hap ban shong ka jingïalang kaba kyrkieh ban ïa pyrkhat sani bad ban ïathir jingmut.
U Bah S Nongdkhar, uba dei u nongaiktien ka ïing Syiem ha ka jingïadonlang u Bah S Syiemïong, hynmen jong u Pa’iem Nobosohphoh, u Bah P Nongdkhar kynum jong u Syiem bad kiwei kiwei ki la pynpaw ba ha katei ka jingïalang, la pynkut da ka rai ban wer ïa kita ki briew ki bym shym la lah ban tip ki dei mano ba ki dei ban wan shakhmat ban ïakren sha ka miej bad lada kim lah ban ïa sngewthuh jingmut shuh bad u Syiem namar ka ïing ka long ba la kloi ban shim ka jingkitkhlieh ban ïakren sngewthuh bad na ka bynta u Syiem hynrei ban shu wan syntiat pyntieng ka pynshitom mynsiem ïa baroh lang. Ïa katei ka jingïalang la pynlong ha ka shnong Nongkhlaw ha West Khasi Hills District, bad la ïoh jingtip ba ha kaba ïadei bad kitei ar tylli ki jingjia u Syiem u la leit ruh ban buh da ka ejahar ha thanat Nongstoiñ.
