Shillong, Nailur 08
Ki pulit jong ka East Khasi Hills ki la bteng ban pynjur ïa ka jingkhynra jong ka jingdie bad khaïi kyiad beaiñ ha kylleng ki bynta jong ka nongbah Shillong bad la ïoh ruh ban kurup haduh 250 liter ka kyiad.
Ha ka kyrwoh khubor ba la pyllait da u Superintendent of Police ka East Khasi Hills u Bah Sylvester Nongtnger u la ong, ha kane ka jingbteng jong ka jingpynjur ka jingkhynra kyiad beaiñ, ha ka miet jong ka Sngi Saitjaiñ ki pulit ki la ïoh ban kurup haduh 250 liter ka kyiad ba khaïi beaiñ, ba kynthup 50 liter ka kyiad phareng bad palat 200 liter ka kyiad pyrsi.
Ïa kane ka kyiad la ïoh ban kurup na ka jingkhynra kaba la pynlong ha ka thaiñ Sadar, Polo, Urkaliar, Laitumkhrah, Madanrting bad Mawblei. Hadien ba la ïoh kurup, ki pulit ki la pynlong ruh da ka jingtheh lut ïa baroh ka kyiad sha madan.
Ha kawei pat ka khubor, u SP u la pyntip ba nalor kane ka jingkhynra, ki pulit ki la leit ruh ban tehlakam ïa ki jingtem jingrwai ba pynheh ha ki kali ba pynïeng harud surok, ka jingbat ïa ki kali ba ñiah da kiba la shoh khawiang bad kiwei kiwei.
U SP u la pyntip ruh ba ki pulit ka East Khasi Hills kin ïai bteng ban pynlong ïa kum kane ka jingkhynra na ka bynta ban wanrah ïa ka jinglong ba shngaiñ, bad ba suk ba saiñ ha nongbah Shillong.
