Shillong, Nailur 08
U MDC ka Nongkrem, Bah Lambor Malngiang u la ong ba dang lah ki MDC kiba la ‘Expired’ ne kiba la kut noh ka samoi treikam ban ïa uba iehnoh kam mar sien long MDC.
“Kita ki nongkren ki la dei ban pyrkhat shuwa ïalade, kum u President ka VPP u la dei ban pyrkhat jylliew bha ïa kane ka kyntien kaba u kren. Hangno ngi long ‘Expired’, dang lah kiba long ‘Expired’ em ban ïa u briew uba mar sien long MDC mar sien iehnoh
kam…te dei ban sngewthuh,” ong u Bah Malngiang haba kren sha ki lad pathai khubor ha ka Sngi Saitjaiñ halor ka jingkynthoh u President ka VPP, Bah Ardent M. Basaïawmoit ba ki MDC ba mynta ki long kum ki dawai ba la kut por naba ka samoi treikam jong ki ka la kut.
Haba pynshai halor katei ka bynta, u la ong ba ka don ka kyndon hapoh ka Khyrnit ba 6 kaba kren shai ba lada donkam ban ïoh ïa ka jingpynjlan halor ki nongrim kiba biang, u Lat u lah ban ai ka jingmynjur.
“Kam dei ba ong ba la kut ka samoi treikam, ngi shu shong jubor…em, ka bym lah long kata. Hynrei uta uba kren u dei ban sngewthuh shuwa ïalade aïu u leh, mar sien dep jop…ieh ïa u paidbah sha lyndet, iehnoh kam, te ngin ïa ong kumno shuh,” u la ong.
Kum ban shu kdew hangne, ïa ka ilekshon sha ki 2 tylli ki District Council (KHADC& JHADC) mynta yn pynlong hapoh ka 5 tarik Lber, 2025.
Kham ha shuwa, u Lat ka Jylla, u C.H. Vijayashankar u la mynjur ïa ka KHADC (Constitution of District Council) (Amendment) Rules, 2024, bad ka JHADC (Constitution of District Council) Amendment Bill, 2024, kaba plie lynti na bynta ka jingpynbeit ryntih ïa ki konstitwensi ha shuwa jong ka ilekshon. Katkum ki tyllong khubor, ka tnad District Council Affairs (DCA) ka la phah ïa ki kyndon ba la wanrah jingkylla sha u Lat hadien ba la ïoh ïa ki jingtip ba bniah na ka tnad aiñ ka Jylla.
Ha kawei ka liang, ka Sorkar Jylla ka la ïada ïa ka rai ban pynjlan ïa ka samoi treikam jong ki 2 tylli ki District Council bad kyntait ba ka kiar na ka jingpynlong ilekshon.
Dang shen, u Symbud Myntri Rangbah ka Jylla, Bah Prestone Tynsong, uba khmih ruh ïa ka tnad DCA u la pynshai ba ka jingpynjlan ka long kaba donkam namar ka jingslem jong ka kam haba ïadei bad ka jingpynkhreh ïa ki ilekshon.
Haba kdew ïa ka Khyrnit ba 6 ka Riti Synshar ka ri, u la ong ba ki kyndon ki shah ïa u Lat ban pynjlan ïa ka saooi treikam jong ki District Council haduh 12 bnai lada ka jinglong-jingman ka dawa. Kham ha shuwa, ïa ka samoi treikam jong ka KHADC bad JHADC la pynjlan mynta u snem da 6 bnai bad mynta pat la pynjlan shuh sa da 6 bnai.
U Bah Tynsong u la ong ruh ba tang ban pynbna ïa ka ‘Appendix’ jong ki kyndon kan shim por kumba shi bnai shiteng, namar kan hap kynthup ïa ka thup jong ki shnong kiba la wanrah jingkylla.
Haba ïadei bad ki kor EVM, u la ong ba ka Sorkar Pdeng ka la ai jingbit tang ïa kawei ka Public Sector Undertaking (PSU) ban pynmih ïa ki EVM bad la kyrpad ïa ka kompeni ban wan sha Shillong ban jurip ïa ki EVM barim.
Shuh shuh u Bah Tynsong u la ong ba ka Sorkar Jylla kan hap shah ïa ki District Council ban ïoh jingkheiñ na ki ‘Electoral Roll’ ba la pynmih da ka Election Commission of India (ECI). U la bynrap ba ka jingkhmih bniah kan shim por ym duna ïa ka 3 bnai shiteng ha shuwa ban pynmih ïa ki kyrteng ba pura jong ki nongthep ‘vote’.
