Shillong, K’lyngkot 28
Ka nongbah Shillong kumba ka long mynta kan nym lait shuh na ka jingkhapngiah bad kane ka buh jingeh bha ïa ka rukom im ha sor katba nang mih ki sngi ki snem khamtam ha ka leit ka wan.
Hynrei ka lad ban kylluid ïa ka nongbah Shillong ka dei tang ka jingpynkynriah ïa ka nongbah sha New Shillong Township (NST) ha ryngkat ka jingpyntreikam ïa ki sienjam kiba la nang shim da ka Sorkar kaba long ka jingpyrkhat lypa na ka bynta ki phew snem ki ban sa wan.
Ha kawei na ki jingbatai ka tnat Transport haba ïadei bad ki jingeh kiba mad ha sor khamtam ha ka leit ka wan, ka daw ka dei namar ka jingbym lah ban pynheh ïa ki surok bad ka jingnang bun ki kali kynthup ki kali jong ki riewshimet.
Nalor ka jingnang bun ki kali thymmai, la ong ba ki surok kiba kham heh ruh ki la nang rit noh namar ka jingpynïeng kali harud surok nalor ka jingkyntur kiba shong die madan, bad ka jingsangeh thurmur ki kali. La ong ba ka jingpynrung thymmai ïa ki kali ha nongbah Shillong ka sted bha bad ka long kumba 47% bad ka jingkhapngiah ka la nang buh jingeh ïa ki nongshong shnong ha ka leit ka wan kaba man ka sngi.
Hynrei ka tnat Transport haba pyni ïa ki sienjam kiba ka Sorkar Jylla ka la nang shim, ka la batai ruh shaphang ki kam pynroi kiba la nang leh ha NST naduh ka jingshna ïa ki surok thymmai kiba kham kylluid kiba pynïasoh hapdeng kane ka jaka bad kiwei ki surokbah, nalor ka jingtei ïa ki shlem treikam jong ki tnat treikam bapher bapher ka Sorkar.
Ka jingbuhthong ka Sorkar MDA ka long ban tei kloi ïa ka Secretariat kaba thymmai ha NST bad kane kan wanrah ka jingkylluid ïa ka nongbah Shillong.
Ka tyllong khubor ka ïathuh ba ka Sorkar ka la dep pynkhreh lypa ruh kumno ban kham pynheh ïa ki surok kiba la don lypa ha nongbah Shillong katba don ka lad hadien ba la lah ban tei ïa ka Administrative City ha NST.
La ong ba ha kine ki khyndiat bnai yn sa khot ‘tender’ noh ban tei ïa ka Secretariat nalor kiwei kiwei ki jingtei kiba donkam ban leh kham kloi noh.
Shuh shuh la ïathuh ba ha u Lber yn sa pyndep noh ïa ka rukom pynwandur (design) ïa ka Secretariat kaba thymmai bad ka jingtei kan kot sha ki spah klur tyngka.
