Shillong, K’lyngkot 31
U Myntri ka Sorkar Jylla uba dei ruh u nongïalam ka National People’s Party (NPP) u Marcuise N Marak u la kob ba ym don kino-kino ki seng saiñ pyrthei kiba long ka jingma ïa ka seng ha ka ilekshon Lok Sabha ka ban sa wan na Tura Parliamentary konstitwensi.
Haba sngew skhem ba ka NPP kan jop na Tura lyngba ka MP kaba mynta ka Agatha K Sangma, u Marak u la ong ba ym don jingma ruh na ka Congress wat lada ïakhun hi u MLA na Gambegre konstitwensi u Saleng A Sangma kum u kyrtong ka Congress na Tura.
U la kren kob ba ka Congress ka dei ka seng kaba ki briew ki la klet namarba kam don shuh ki nongïalam bad ka Congress kan nym lah ban poi ha kato ka bynta kumba ka ju long ha ki snem ba la leit.
Haba kylli shaphang ka BJP ha Rilum Garo kaba dei ruh ka paralok hapoh ka MDA, u Marak u la ong ba ka BJP ka dei ka seng kaba ki paidbah ha Jylla kim pat da pdiang ha kaba la sakhi ha ka ilekshon MLA kaba dang shu dep ba ka BJP ka ïoh MLA 2 ngut khlem kylla na kaba ka ïoh 2 ngut ha u snem 2018.
Haba ïadei bad ka TMC bad u Dr Mukul Sangma ha Rilum Garo, une u nongïalam ka NPP u la ong ba u Dr Mukul u la duh noh ka jinglah ban khring kum u nongïalam bad lada u rai ban ïakhun ha kane ka ilekshon Lok Sabha ruh kam don satia ka jingma ïa ka NPP. “Namarkata, ka NPP kam don ka jingma nangno-nangno haba ïadei bad ka Tura konstitwensi,” la bynrap u Marak.
