Shillong, Rymphang:
Ka Khun Kur Longtrai Lai Kynthei jong ka Raid Shabong ha Khyrim Syiemship lyngba ka Heritage Committee ka la pynlong ïa ka jingpynkup burom bad ka jingithuh ïa ki nongïalam ïa ki nongjngoh kai (Tour Guide) sha ki jaka jngohkai ha Raid Shabong myn ha ka 29/01/24 ha Madan shad Lyngdoh, Rangthylliang.
Ka jingthmu jong kane ka jingithuh ka long kum shi bynta ban ai ka jingshngaiñ bad ruh ban plie ka lad ïoh kam ïoh jam ki samla na ka Thaiñ Riwar Mihngi jong ka Pynursla. Kane ka long ruh kum shibynta ka jingleh ryntih jong ka Committee halor ka kam ban kyntiew bad ban pynjanai ïa ka kam shangkai pyrthei ha katei ka thaiñ.
U Bah Ribanroilang Lyngdoh haba kren kum u kongsan ha katei ka jingïalang, u la ai ka jingkhublei kitbok kitrwiang ïa kitei ki samla kiba la shah pynkupburom da ka Heritage Committee jong ka Khun Kur Longtrai Lai Kynthei. Nalor nangta u la ïathuh kane ka sienjam kadei ruh ka bynta kaba kongsan ba kum ki trai jong ka Raid ki sngewdei bad i donkam ban don kane ka jingithuh kyrpang ïa ki nongïalam sha ki jaka jong ka Raid Shabong, namar ha ka ki don bun ki jaka kiba don ïa ki jinglong kyrpang kiba kham ñiar ban shem sha kiwei pat ka jaka ha Meghalaya.
Nalor kata, u la bynrap ruh ba ka Raid Shabong kadei ka Raid kaba don ïa ka niam ka rukom bad ha ka ki don shibun ki jaka ba long kyntang kiba don ïa ki ryngkew ki basa kiba ym long ban shuh leit khlem da don ki nongïalam kiba la ithuh da ki trai khyndew ki trai jaka jong ka Raid.
Shuh shuh ha kane ka jingïalang la sakhi lang da u Bah Nikelson Khongmawloh uba dei u General Secretary jong ka Raid Shabong ha kaba u la pynskhem ïa kane ka kam jong ka Heritage Committee jong ka Khun Kur Longtrai Lai Kynthei kiba dei ma ki kum ka kmie kaba kdup kaba ri ïa ki khun ki hajar jong ka Raid.
Haba bynrap ïa ka jingkren jong u Bah Ribanroilang Lyngdoh, na ka liang u Secretary jong ka Raid u la ïathuh bad pyntip sha ki nongïalam ba ym tang ba ka Raid Shabong ka don ïa ki jaka ba itynnat, kiba i shongkhia, hynrei ka don ruh ïa ka jingleh tynrai lyngba ki sap ki phong kiba ki khun ki hajar ki don ban pyni sha ka pyrthei lyngba ka put ka tem, ka rwai ka siaw, ki jingtrei kti bad kumta ter ter .
La pynïaid ïa kane ka jingïalang da u Chairman jong ka Heritage Committee u Bah Morningstar Khongthaw , ha kaba u la pyntip ruh ba ka Heritage Committee ka don ïa ka bynta kaba khraw ban sumar sukher ban pynneh pynsah ïa ki jonglong tynrai jong ka Raid Shabong, bad ruh ban thaw ki lad kamai ïa ki samla ka thaiñ lyngba kane ka kam pynneh pynsah ïa ki jonglong kyrpang jong ka Raid, bad ruh ban long kum ka nuksa sha kiwei pat ki Raid ki Elaka jong ka Ri Khasi Jaiñtia bad ha Jylla hi baroh kawei. Nga kwah ban pyntip sha phi ba kane ka dei ka sien ba nyngkong ba kum ki trai jong ki jaka jngohkai ngi ai ka jingithuh kyrpang ïa ki ‘tourist guide’ jong ka thaiñ .
La ïa don ryngkat lang ha kane ka jingïalang da ki ‘riew rangbah jong ka Khun Kur Longtrai Lai Kynthei jong ka Raid Shabong bad kiwei pat kynthup 14 ngut ki nongïalam ïa ki nongjngohkai pyrthei .
Kane ka long u kyrwoh na u Secretary jong ka Heritage Committee, Khun Kur Longtrai Lai Kynthei Raid Shabong, u Bah Pynhamboklang Sohkhlet.
