Nongstoiñ, Rymphang 02
Ha kawei ka jingjia, kawei ka longkmie ïa kaba la tip kyrteng kum ka Kong Wansaralin Wanniang (26 snem ka rta) ka la duh noh la ka jingim hadien ba ka la shah pom da ka wait ha u kurim uba la ïashong khlad bad ka.
Ïa u kurim jong ka, la tip kyrteng kum u Bah Biangkupar Nongsiej na ka shnong Lawse, West Khasi Hills. Katei ka jingjia ka la jia ha kawei na ki jaka hajan ïingsah jong ka Kong Wanniang ha ka dong Khlieh Shnong jong ka shnong Tiehsaw, Nongstoiñ.
Ka tyllong khubor na ki pulit ka ïathuh ba katei ka jingjia ka la jia mynta ka janmiet – 2 tarik u Rymphang 2024 ha ka por 6.30 baje janmiet bad la ong ruh ba katei ka longkmie ka dei kaba dang armet.
Ka khubor na ki heh pulit ka ïathuh ba ka jingduh noh jong katei ka longkmie ïa ka jingim ka dei namar ka jingshah pom da ka wait na ki bynta jong ka khlieh ha utei u briew.
Shuh shuh, ki heh pulit ka distrik ki la ong ba ïa katei ka jingjia, na ka liang ki pulit ki la ïoh ïa ka jingpyntip ha ka por 7.00 baje mynmiet bad hadien kata mar-mar ki la leit sha katei ka jaka ban kem noh ïa utei u briew bad ka jingtohkit ka dang ïaid shakhmat.
Ha kajuh ka por, la ïoh ban kurup noh ïa ka wait kaba u la pyndonkam ban mait ïa katei ka longkmie.
Kumjuh na ka liang ki pulit hadien ba ki la pyndep ïa ki jingdonkam baroh, ïa ka met ba dang sah jong katei ka longkmie la rah ban pynkit noh sha Civil Hospital, Nongstoiñ ban pyndep ïa ka ‘Post Mortem’.
Na ka liang ki heh pulit ka distrik ki la pynpaw ruh ïa ka jingai khublei ïa ki paidbah nongshong shnong ha katei ka jaka kiba la ïarap ïa ki pulit ban ïoh kem ïa utei u runar.
