Shillong, Rymphang 02
U Dr. Ricky AJ Syngkon uba dei kyrtong MP Lok Sabha na ka seng VPP, u la ong ba lada ki paidbah ki ong ba ka pisa ka kren briew ha ka por ilekshon, ki lah ban leit ïathuh noh ha ka pisa ïa ka jingeh ba ki ïakynduh lada ym biang ki jaka sumar, ki skul bad ki surok.
U Dr. Syngkon u la kren ïa kane ha ka jingïalang pynskhem ïa ki nongkitkam ka VPP Mawkynrew Circle ha Maw-U-Sam ha ka Sngi Thohdieng uba la pynkynmaw haba u ïalap ilekshon MLA haba u ïakhun na Umsning konstitwensi ki paidbah ki ong ïa u ba ka pisa ka kren briew namar khlem pisa ym long hynrei haba u la sei ïa ka pisa ban buh ha ka miej, ki paidbah ki ang lyngngoh haba um kren shuh.
U Dr. Syngkon u la ïathuh biang haba ki paidbah ki la kylli balei bym kren shuh, hangta u la ïeng biang ban ong ba lada phi ong ba ka pisa ka kren briew ïathuh noh ha ka pisa ïa ka jingeh jong phi lada duna ki jaka sumar, ki skul, ki surok bad kiwei de.
U la ong ha ka por ilekshon kiwei ki kyrtong ki pynbiej da ka pisa, hynrei ka seng VPP kam don ka rupa bad ksiar ban ai, hynrei dei tang ka hok jingshisha ban rah ïa ka jaidbynriew.
“Ngim don pisa ban pynbiang shuki ngi don ka mynsiem kaba sngewkhia, hynrei kaba mano ban ïalam ïa ki paidbah ban pynshongshit ban pynsngewbha tang shisngi” u la ong.
U la ïathuh ba ha ka por ilekshon ki don ki briew kiba wanrah ar tylli ki lama ha ïing bad kane ka la wanrah ïa ka jingïapait jingïapra.
