Shillong, Rymphang 02
Ki nongshong shnong jong ka Laitumkhrah ha ryngkat bad kiba khmih ïa ki shlem pule kiba don ha Lady Veronica Lane Laitumkhrah ki la pynpaw ïa ka jinglyngngoh bad ka jingpyrshah halor ka jingthmu jong ka sorkar ban pynkynriah noh ïa kiba shong die jingdie harud ka surok Laitumkhrah sha Lady Veronica Lane, Laitumkhrah.
Kum ban pynkynmaw, ka Myntri jong ka Sorkar Jylla, ka Dr. Mazel Ampareen Lyngdoh kaba dei ka nongmihkhmat jong ka East Shillong Constituency ha ka 22 tarik u Kyllalyngkot 2024, ka la pyntip ba yn sa pynkynriah noh ïa kiba shong die jingdie harud surok ha ki bynta jong ka Laitumkhrah.
Ka Kong Ampareen ka la ong ba hadien ka jingïalang bad ka Dorbar Shnong Laitumkhrah Pyllun bad ki ophisar ka tnad PHE ki la shim ïa ka rai ban pynkynriah noh ïa kiba shong die jingdie harud surok kaba dei ka lynti ïaid kjat ki paidbah bad ban pynkynriah ïa ki na Laitumkhrah surokbah sha Veronica Lane Laitumkhrah bad ban pynkylla ruh ïa ka rukom pynïaid kali ha katei ka thaiñ.
Namar kata, ki nongshong shnong ka shnong Laitumkhrah ha ka 2 tarik u Rymphang 2024 ki la mih shakhmat ban ïakren bad ki lad pathai khubor halor katei ka mat ha kaba ki la pynpaw ïa ka jingsngewkhia halor kane ka jingthmu jong ka sorkar namar ka jingbym ïoh jingtip eiei ki nongshong shnong halor katei ka rai ba la shim da ka sorkar bad ki nongïalam shnong tad haduh ynda la ïohi ha ki lad pathai khubor.
Haba kren sha ki lad pathai khubor, ka Kong Monalisa Wankhar kaba dei ka nongshong shnong jong ka Veronica Lane Laitumkhrah, ka la ong ba kum ki nongshong shnong kim shym la ïoh jingtip eiei lane ka jingpynbna halor kane ka jingthmu jong ka Dorbar Shnong bad ka sorkar.
Ka Kong Wankhar ka la ong ba kum ki nongshong shnong ki la kyndit thret bad kumba ïuh tdong bseiñ haba ki la ïohsngew halor kane ka jingthmu. Haba wad jingtip halor kane ka jingthmu, la lap ba ïa katei ka rai la shim hi shimet khlem da kynjoh ktien ïa ki nongshong shnong.
Ka Kong Wankhar ka la ong ba kum ki nongshong shnong ki la pynpaw ba nalor ba ka surok ha Veronica Lane ka la dei lypa kaba khim, kam don nongrim ban pynkylla ïa ka rukom pynïaid kali namar katei ka jaka ka dei kaba don bun ki jaka sumar bad ki skul kum ka Bethany Society kaba dei ka skul na ka bynta kiba don jingduna ha ki dkhot met, ka Mary Rise Centre kaba dei ka skul na ka bynta ki khynnah kiba don jingduna ha ka bor pyrkhat bad nalor kata ka don ruh ka jaka sumar khmat jong ka Bansara Eye Care bad ban pynkylla ïa ka rukom pynïaid kali kan buh jingeh ïa ki nongpang haba ki leit sumar ha kitei ki jaka.
Ka Kong Wankhar ka la ong ba ka long kaba sngewsih ba ka Myntri kaba dei peit ïa ka tnad ka koit ka khiah ka khlem da pyrkhat lem ïa ki nongshong shnong ha kaba ka la shu pynbna hak-dak ban pynkynriah noh ïa ki nongdie jingdie ha madan sha ka Lady Veronica Lane.
Shuh shuh kitei ki nongshong shnong ki la pynpaw ruh ba ki la dep ban phah da ka shithi ha kaba ïadei bad kane ka bynta sha ki bor ba dei khmih jong ka sorkar, ki Myntri bapher-bapher bad kumjuh ruh ïa ka Deputy Commissioner (DC) ka East Khasi Hills District hynrei haduh mynta kim pat ïoh jubab satia halor kane.
“Kane ka long kaba pyndiaw mynsiem ïa ngi kum ki nongshong shnong bad ka la pynsngewsih eh ïa ngi haduh katta-katta ba ngim banse shuh ba ngin shim noh ïa kane ka rai ban wan sha ki lad pathai khubor khnang ba baroh ki briew kin tip bad ïohi ïa ka jingbym suitñiew jong ki nongmihkhmat jong ngi halor ka jingeh kaba ngi shah ktah ha kane ka rai”, la ong ka Kong Wankhar.
Na ka liang u Secretary jong ka Bethany Society, u la ong ba kum ki nongdie jingdie ki don ïa ka hok ban kamai jakpoh hynrei hashwa ban pynkynriah ka dei ban don ka Town Vending Committee ka ban rai halor ka jingai ïa ka jaka.
Utei u Secretary ka Bethany Society u la ong ba lada ki pynshong ïa ki nongdie jingdie ha ka jaka ïaid kjat kaba don ha Lady Veronica Lane, ka la long kumba shim noh ïa ka hok jong ki paidbah kiba ïaid kjat, ki khynnah skul bad ki briew kiba don jingduna ha ki dkhot met ba kin lah ban poi suk poi saiñ sha ki jaka pule jong ki.
Na ka liang ka Kong Bertha Dkhar kaba dei ka Director jong ka Bethany Society, ka la ong ba ka surok ha Lady Veronica Lane ka dei kaba la pyndonkam da baroh ki khynnah skul bad kumjuh ruh kiba leit phah sumar namar ba ka lait na ka surokbah.
