Shillong, Rymphang 04
U Syiem ka Hima Nongkhlaw u Pa’iem Phrestar Manik Syiemlieh, u Syiem Khynnah ka Hima Nongkhlaw u Pa’iem Kestonbel Manik Syiemlieh bad u sordar ka shnong Nongkhlaw Bah Clement Dkhar kaba hap mynta ha Eastern West Khasi Hills District kin sa ïoh ban leit lang sha nongbah Dhaka jong ka ri Bangladesh ban don ryngkat lang ha ka jingplie ïa u motdur jong u Tirot Sing Syiem.
Ha kine ki sngi ka sorkar jylla ka la pynbna ba kan plie ïa u motdur jong u Tirot Sing Syiem ha nongbah Dhaka ha ka 16 tarik u Rymphang, 2024 ban pynsahnam ïa u namar u la ïap ha Dhaka hadien ba la set byndi da ki shipai phareng. U dei u Syiem ka Hima Nongkhlaw uba kylla long u khlawait jong ka jaidbynriew hadien ba u la ïeng ïaleh pyrshah ïa ki shipai phareng.
Haba ïoh ban ïakren bad u Syiem Khynnah ka Hima Nongkhlaw u Pa’iem Kestonbel Manik Syiem, u la ïathuh ba ka sorkar ka la jied ïa kitei lai ngut ban ïadonlang haba plie ïa u motdur u Tirot Sing ha Dhaka kaba kin sa mih lang na Shillong ha ka 15 tarik mynta u bnai.
U la pynpaw ka jingsarong ïa ka jaidbynriew bad ïa ka Hima Nongkhlaw kaba ka sorkar jylla bad sorkar India ki la lah ban kynmaw burom ïa u khlawait jong ka jaidbynriew ban tei ïa u mot shaduh Dhaka.
Nalor nangta, u la ïathuh ba ka jingtei ïa u mot sha Dhaka ka dei namar ïa u Tirot Sing Syiemlieh ha ka por ba u long u Syiem ka Hima Nongkhlaw ki shipai phareng ki pynryngkang par ïa u bad set byndi haduh ban da ïap ha Dhaka kaba dei ka nongbah jong ka Bangladesh kaba mynta.
U Pa’iem Kestonbel u la ai khublei kyrpang ïa u Bah Sanbor Shullai namar dei ha ka por ba bat ma u kum u Myntri Art & Culture jong ka sorkar jylla u la thoh shithi sha ka sorkar India bad ka sorkar India ruh ka la ïakren bad ka sorkar Bangladesh haduh ban da pynurlong ban tei ïa u motdur jong u Tirot Sing ha Dhaka.
Kum ban shu pynkynmaw, ïa u motdur jong u Tirot Sing ba la dep shna bad buh ha Directorate Arts & Culture Shillong la rah noh ha ka 2 tarik mynta u bnai ban leit pynïeng lypa sha Dhaka khnang ban suk ha kaba u Symbud Myntri Rangbah ka jylla Bah Sniawbhalang Dhar un plie pyrda ha ka 16 tarik u Rymphang 2024.
