Shillong, Rymphang 05
U nongïalam ka United Democratic Party (UDP), Bah Paul Lyngdoh, u la ong ba ka jingkren u Lat lada u ai jingkren da ka ktien Hindi la dep ban pynkylla lypa sha ka ktien Phareng, hynrei kaba donkam shuh shuh ban leh eiei ka dei sa ïa ki ar tylli ki ktien kiba dei ki ‘Associate Language’ ka Khasi bad Garo.
U Bah Paul u la pynpaw ïa kane halor ka jingkren u Lat da ka ktien Hindi ha ka sngi basdang ka Dorbar Mang Tyngka ha ka 16 tarik mynta u bnai bad ka jingdon kiba dawa ban nym kren da ka ktien Hindi.
U Bah Paul u la ong ba ïa ka jingkren u Lat kumba ju leh borabor, la dep ban pynkylla lypa sha ka ktien Phareng lada u ai jingkren da ka Hindi, bad ym ïohi ba kan don kata ka jingïapher lada u Lat u kren da ka Hindi namar ha kajuh ka por la ai ïa ka jingkren jong u ha ka ktien Phareng.
U la ong ba kane kam dei kaei-kaei kaba pher namar lada peit hapoh parliament ruh ki kren da ki jait ktien bapher bapher.
Kumta u Bah Paul u la ong ba ha kane juk stad mynta kaba don ruh ka Artificial Intelligence (AI), kaba donkam ka long ban leh eiei ïa ki ar tylli ki ktien ka Khasi bad Garo namar ki dei ki ‘Associate Language’ ka Jylla ha kaba u nongkren lada u kren da ka ktien kaba u nang bha bad kiba sngap ruh ki sngap da ka ktien kaba ki sngewthuh bha.
U Bah Paul u la bynrap da kaba u pynshlur ban kren ym tang da ka ktien English ha Ïingdorbar hynrei ban kren ruh da ki artylli ki official associate language jong ka jylla kita ka ktien Khasi bad Garo ha kaba ki dei ban don lypa ki jingpynkylla sha ka ktien kaba sngewthuh lang ha kane ka juk ba don ki kor ki bor khamtam ka artificial intelligence.
