Shillong, Rymphang 05
Ka Sorkar Jylla ka dang pynïaid ïa ka jingkren haba ïadei bad ki jaka ha Block-I bad kane ka kam dang khmih bniah bad shim jingkheiñ da ki bor district ban tip katno tylli ki shnong ki dei kiba sah da ki paid Khasi bad katno tylli ki dei kiba shong ba sah da kiwei pat ha kito ki jaka ha khappud.
Ïa kane la pynpaw da u Symbud Myntri Rangbah u Bah Sniawbhalang Dhar uba peit ruh ïa ka Regional Committee ha Jaiñtia Hills kaba don khappud bad ka West Karbi Anglong na ka bynta ka jingpynbeit pud.
Haba kylli halor ka jingïakynduh ka kynhun na Block-I ïa u dang shen haba ïadei bad ki shnong ha Block-I ban pynhap biang hapoh u pud u sam ka Meghalaya, u Bah Sniawbhalang u la ong ba ha ka jingïakynduh, ki la pynpaw ka jingsngew jong ki bad ïa kane ka mat dang ïaid ka jingïakren ha kaba ki bor district ki dang peit bniah bad shim jingkheiñ katno tylli ki shnong ba sah ki paid Khasi ki hap ha Block-I bad katno tylli kiba sah da kiwei pat ki jaitbynriew.
U la ong ba ka Sorkar Jylla ka kwah ban bteng ka jingïakren bad ka Sorkar Assam hynrei hapdeng jong kane, kan wan sa ka ilekshon Lok Sabha ha kaba ki kam ki lah ban sahteng shwa.
Ki shnong Khasi kiba hap ha Block-I ki dei kiba la ngat sha Assam naduh u snem 1951 ha ka por ba ki jaka kiba hap hapoh u pud u sam ka United Khasi Jaiñtia Autonomous District Council la pynhap sha Mikir Hills kaba dei mynta ka Karbi Anglong Autonomous Council.
