Shillong, Rymphang 06
Hadien ka jingpynlong ban wad ïa ka met jong u Bah Marshal Marweiñ uba la shah tep im ha ka synrum ñiut kaba rben ha Marten ha ka step jong ka 3 tarik u Rymphang, la lap noh ïa ka met jong utei u samla rangbah ha ka 6 tarik jong ujuh bnai na katei ka jaka.
Haba ïakren lyngba ka ‘phone’ mynta ka miet bad uwei na ki bakha jong u Bah Marshal, u la pynthikna ba katei ka met ba lap kadei shisha jong une u bahaïing jong u.
Kum ban shu pynkyn maw, u Bah Marshal Marweiñ, 30 snem ka rta, u dei uba imsngi da kaba tam tin jot hapoh ka Marten kaba don ha Mawïong. Pynban dei ha ka 3 tarik u Rymphang katba utei u samla rangbah u dang bteng ïa ka kam bad dei ha ka por ba u dang wad prek ha katei ka jaka, ka synrum ñiut kaba rben ka la khyllem bad ban kynsan ïa u Bah Marshal.
Ïa ka metïap jong u Bah Marshal la lap hi da ki bahaïing bahasem bad na ka liang ki bahaïing-bahasem hadien ka jinglap ïa katei ka metïap na katei ka jaka, ki la pyntikna ba ka dei ka metïap jong u doh u snam jong ki.
Wat la na ka liang ki bor pulit, ka State Disaster Response Force (SDRF), ki bahaïing bahasem bad ki paralok ba ïatreilang bad u Bah Marshal ki la ïatreilang borbah ban wad ïa u Bah Marshal naduh katei ka sngi ba u la shah ban ha u synrum ñiut hynrei ki khlem lap satia ïa u. Dei tad hadien 3 sngi naduh ba u la jah, la lap noh ïa ka met jong u Bah Marshal na katei ka jaka ha ka por 4:30 janmiet ha kaba la lap nyngkong eh shwa ïa ka khoh kaba une u samla u la pyndonkam ha ka ban tam ïa ki ñiut bad ki tin jot bad ki bilor bad hadien kata pat kin sa lap sa ïa ka metïap jong u.
Na ka liang jong ki bor pulit, ki la pynlong ka jingtohkit ïa ka met jong u Bah Marshal Marweiñ ha katei hi ka jaka ba la lap.
