Shillong, Rymphang 07
Ka Myntri ka Sorkar Jylla ka Kong Ampareen Lyngdoh ka la ong ba ka jingïakren haba ïadei bad ka Meghalaya Lokayukta ka la shai kdar, hynrei lada don ki bym mynjur, ka don ka lynti ba kin ïaid da kaba kyrpad ruh ba ka bha ban iehnoh ïa ka jingkawang ktien ka bym poi sha ka jingmyntoi jongno-jongno.
Haba kylli halor ka jingdawa ban thungkam biang ïa ki ophisar kiba la shongthait, ka Kong Ampareen ka la ong ba lada ki don da kiwei ki lynti ïaid, bad sa ïaid da kita ki lynti ban wad ïa ka jubab khlem da pynkulmar khlieh shuh ïano-ïano.
“Nga sngew ba ngi la dep ïakren la biang halor kane ka mat bad ngam kwah shuh ban ïa ktaid hajuh. Kumta wad da kiwei ki lynti bad khie leit leh ïa kaba dei ban leh,” la ong ka Kong Ampareen haba dawa ban thungkam biang ïa ki ophisar kiba la shongthait na ka kam ban don hapoh ka Meghalaya Lokayukta.
Dang shen u Myntri ka tnat jngohkai pyrthei u Bah Paul Lyngdoh uba dei ruh u nongaiktien ka Sorkar MDA u la ong ba ha kano ka rukom kan ktah ïa ka jingtreikam ka Meghalaya Lokayukta.
U la ong ba ym lah ban shu leh kam saiñ pyrthei tang ban pynphai ïa ki jingmut jingpyrkhat ki paidbah.
Ka VPP ka la dawa ban thungkam biang ïa ki ophisar kiba la shongthait na ka kam hapoh ka Meghalaya Lokayukta bad kynnoh ba ka jingweng ïa ki ophisar kiba la shongthait ka dei namarba ka Sorkar ka tieng ïa ka jingtohkit halor ki kam bym dei kiba la leh ha GHADC bad ban ïada ïa kito kiba donkti ha ka bamsap. Kum ban pynkynmaw, ka Meghalaya Lokayukta ka la dep chargesheet ïa ki katto katne ngut kiba shah kynnoh ha GHADC.
