Shillong, Rymphang:
Ka sorkar jylla lyngba u Myntri Rangbah, u Conrad K Sangma ka la plie paidbah ïa ka Prime Meghapreneur Expo 2024 kaba la long ha madan Polo ka ban neh lai sngi lynter kata naduh ka 7 tarik haduh ka 9 tarik u Rymphang 2024.
Ha katei ka sngi la synranlang lang ruh ïa u Myntri Rangbah ka jylla da u Symbud Myntri Rangbah ka jylla, u Bah Sniawbhalang Dhar, u Myntri ka tnad ri jingri, u Bah A.L Hek, ka Deputy Commissioner ka East Khasi Hills, ka Kong R.M Kurbah nalor kiwei kiwei. Ïa ka Prime Meghalaya la pyllait paidbah da ka sorkar jylla ha u snem 2019 bad ka jingthmu jong ka Prime Meghalaya ka long ban kyntiew ïa ki nongseng kam lajong da kaba ai jingïarap lyngba ki jingai jinghikai bapher bapher bad kumjuh lyngba ka song pisa khnang ban lah kyntiew shuh shuh ïa ki kam jong ki bad kumjuh ruh ban ailad ba kin pyni ïa ki mar ki mat jong ki lyngba ki ïew ïadielang.
Ka jingthmu jong kane ka Prime Meghapreneur Expo 2024 ka long kum shibynta ban pyni bad pynpaw pyrthei ïa ki khana jingjop jong ki nongseng kam lajong hapoh ka jylla bad ha kajuh ka por ban ailad ïa kine ki nongseng kam lajong ba kin pyni bad pynïaid ïew ïa ki mar ki mata jong ki.
Ha katei ka ïew pyninam bad ka ïew ïadie ïathied ki la don ki mar ki mata, ki mar bam mar dih, ki jait jingshna bapher bapher kiba kynthup ïa ki teknologi, ki jingdro, ki jingshna, ka riam ka beit nalor kiwei kiwei pat.
Haba ïoh ban ïakren bad ki katto katne ngut ki nongseng kam lajong napoh ka jylla, ki la ong ba ka jingpynlong jong ka sorkar ïa kum kine ki ïew pyninam ka ai jingmyntoi shikatdei eh ïa ki ba kin pyni bad pynïaid ïew ïa ki mar ki mata bad ki mar bam jong ki.
Shuh shuh kitei ki nongseng kam lajong ki la ai mynsiem lang ruh ïa kiwei ba kin trei shitom namar lyngba ka jingtrei shitom yn sa lah ban kiew shaphrang ha ka jingim bad lada don ki briew kiba kynthoh ruh, dei ban pdiang bad pynbha ïa ki jingduna.
Kaei kaba kham sngewtynnad ka long ba ha katei ka prokram la ïohi ba wat kiba don jingduna ha ki dkhot met ruh ki la pyninam ïa ki mar ki mata bad ki mar bam kiba ki la shna hi. Kane ka la ai mynsiem shikatdei eh ïa ki nongthied nongpet ha katei ka ïew pyninam.
