Shillong, Rymphang 08
U radbah ka Hill State People’s Democratic Party (HSPDP) uba la don bynta naduh ki por ba la seng ïa ka bad uba la ïadon bynta ha ka jingïakhih ban ïoh ïa ka jylla bapura, u Bah Thingdar Lyngdoh uba la bat ruh kum u President barim ka HSPDP Nongstoiñ Circle bad kum u dkhot ka CEC ka HSPDP, u la ong ba ka nongrim ba ka HSPDP ka ïeng kam don shuh hynrei ka nongrim ba ka HSPDP ka ju don, mynta ka la don ha ka seng VPP.
Haba ai jingkren ha ka jingïalang pynïasoh jong 30 ngut ki nongkitkam ka HSPDP sha ka seng VPP kaba la long ha ka Sngi Palei ha ka ïingsah jong u President rangbah ka VPP, u Bah Ardent Miller Basaïawmoit, u Bah Thingdar Lyngdoh u la ong ba ka jingmih noh jong u na ka HSPDP ban ai jingshakri pat ïa ka VPP ka dei namar ba ki nongïalam ka HSPDP kim pyrkhat na ka bynta ka lawei hynrei ki la pyrkhat tang ïalade shimet.
U Bah Thingdar u la ong ba la ïohi ba katba dang slem ka HSPDP ka dang hiar bad ka nongrim jong u Maieid Hoping Stone Lyngdoh uba dei uwei na ki nongseng ka HSPDP ruh kam don shuh mynta hapoh ka HSPDP.
“Ka nongrim kaba ka seng HSPDP ka ïeng kam don shuh, ka nongrim jong ka HSPDP mynta ka don ha ka VPP bad ka nongrim jong u Maieid kam don shuh mynta ha ka HSPDP,” la ong u Bah Thingdar.
U Bah Thingdar u la ïathuh ba la khylliap lama ïa ka HSPDP hapoh Nongstoiñ hynrei dei ma u ha ryngkat bad ki katto katne ngut kiba la pynim biang ïa ka seng bad ki la ïaleh pyrshah na ka jingpynduh ïa ka HSPDP hapoh Nongstoiñ.
U Bah Thingdar u la ong ba u la rai rangbah ba un rung bad ïatreilang noh ban pynkhlaiñ ïa ka seng VPP. U la ong ba wat lada u Bah Hoping um don shuh hynrei mynta ka nongrim bad ka lynti kaba u Bah Ardent u don ka poi bad ïalam sha kajuh ka thong kaba don u Bah Hopingstone.
“Lada i Maieid im don shuh hynrei i la don sa i Bah Ardent, nga ïohi ba kane ka VPP ka poi sha kajuh ka thong”, la ong u Bah Thingdar.
