Shillong, Rymphang 11
Wat la ki Khasi ki la shong la sah ha ri Bangladesh la kham slem bha hynrei kaba sngewtynnad ka long ba kim shym la klet ïa ka ktien lajong kaba dei ka ktien pdeng kaba pyndonkam ha Meghalaya. Ïa kane la sakhi ha ki riewngeit na ka Balang Presbyterian haba ki ïakynduh shisien shisnem ha ka Jingïaseng Presbytery ki pyndonkam da ka ktien Khasi lada ki ai ïa ka kaiphot, rwai ne haba ïathuhkhana ruh.
Kaba pynthikna ïa kane ka dei ha ka Jingïaseng Srimongol Borlekha Presbytery kaba 51, kaba hap ha Sylhet Presbyterian Synod, Bangladesh ha ka Balang Presbyterian Nohksiar kaba la sdang naduh ka 9 tarik haduh 11 tarik Rymphang, 2024.
Ka Balang Nohksiar ka dei kaba don markhap bad ka shnong Dawki bad Pardiwah ha India.
Ha kane ka jingïaseng jong ka Srimongol Borlekha Presbytery, ki Khasi kiba sah ha kylleng ka ri Bangladesh naduh ki samla, ki longkmie, ki rangbah, ki Tymmenbasan, ki Pastor ki poi palat khatarspah ngut tang ki dkhot bad ki delegate kiba la poi ha ka sngi sdang naduh ka 9 tarik Rymphang ha ka Balang Nohksiar bad ha ka Sngi U Blei ki riewngeit kiba la poi palat phew hajar ngut.
Ka jingïalang pyrkhat kam ka la sdang naduh ka 9 tarik Rymphang. Ha ka 10 tarik Rymphang la pynlong ka jingpyrkhat kam haduh arsien bad bud sa ka jingïaseng ban pynkyntang ïa ki Tymmenbasan kiba dang shah jied thymmai.
Nangta ha ka nohphai sngi la ailad ban pynïaid ïa ka jingïaseng da ki samla bad ha ka por janmiet ka dei ka jingïaseng kren ‘subject’ jong ka Presbytery.
Ha ka Sngi U Trai kaba dei ka 11 tarik Rymphang 2024, ka jingïaseng paidbah ha ka por 10:00 mynstep la ïoh jingkren na u Pastor W.K. Hujon bad la pynshit rhem shuh shuh ïa ka jingïaseng da ki choir na ka Balang Puthichara, Singur bad Panai.
Ha ka jingïaseng kaba 12 baje shiteng sngi kaba dei ka jingïaseng jong ki kynthei la ai jingkren da ka Kong Thri War.
Ha ka jingïaseng kaba 2:00 baje noh phai sngi la ïoh ka jingkren na u Pastor W.F Ïawphniaw uba dei peit ïa ka Mawphlang Presbytery, Khasi Jaiñtia Presbyterian Synod Sepngi bad la pynshit rhem shuh shuh ïa ka jingïaseng da ka jingrwai choir na ka Balang Nohksiar, Standing Choir Srimongol Borlekha Presbytery bad Balang Umsyiem.
Haba sam ïa ka ktien jong U Blei sha ki riewngeit ha kane ka jingïaseng, u Pastor WF Ïawphniaw u la kyntu ïa ki parabangeit ba kim dei ban sngap ïa ka jingbatai bakla shaphang ka ktien U Blei na ki Social Media kum ha ‘youtube’ namar kin ïalam bakla ïa phi.
U la ong ba wat uwei u ‘engineer’ u la ïathuh haba la test ïa ka jabieng jong kito kiba kyrni ban lehkai mobile ka la ïaryngkat bad ka jabieng kiba ju dik ïa u drok. Kumta u la kyntu ba ki dei ban kiar ban pyndonkam than ïa ka mobile.
Haba kyntu ïa ki riewngeit ha Bangladesh, u Pastor Ïawphniaw u la ong ba kim dei ban mane ïa ka spah ne ka burom namar sha Meghalaya ki don ki nongsharai ki la kyrsum ktieh ban ai pisa ha ka por ilekshon namar kane kam ïahap ban leh katkum ka mon jong U Blei.
Shuh shuh u Pastor u la banjur ban kiar na ka jingdih drok namar ha Shillong kito kiba dih drok ki sdang ban pyndonkam ïa ki khynnah skul ba kin dih bad kin long ki nongshalan sha kiwei pat.
U la pyntip ba la don kiba ïathuh ba mynta ki nongdih drok ki bym hun shuh ban injek kin shu pyndonkam ïa u bseiñ na Africa ban shu phah jliah bad phah puh ïa u thylliej jong ki haduh ba kin dap.
Ha kane ka noh phai sngi u Pastor Ïawphniaw u la sam ïa ka ktien U Blei na ka kitab Ki Kam Apostol ka lynnong kaba 17 bad dkhot kaba 29 haduh 31.
