Shillong, Rymphang 12
Ka jingpang bampong ka dei ka jingpang kaba kynrei ha satlak ka pyrthei. Kane ka jingpang ka dei kaba la ktah bha wat ïa ka jylla ka jong ngi ruh kumjuh.
Ka sorkar jylla ha ryngkat ka jingïatreilang bad ka Appollo Telemedicine Networking Foundation (ANTF) ka la pynlong ïa ka Meghalaya Cancer Conclave 2024 halor ka phangpdeng “Close the Care Gap” kaba la pynlong hapoh ka Cosmos Hall, Hotel Courtyard By Marriott, Shillong ha ka 1 tarik u Rymphang, 2024.
Ha katei ka sngi, ka kongsan ka dei ka Dr. Mazel Ampareen Lyngdoh ha ryngkat ka jingïadonlang jong u Ram Kumar S. IAS, u Secretary ka tnad ka koit ka khiah ka sorkar jylla, u Sampath Kuma, IAS, u Principal Secretary ka tnad ka koit ka khiah, ka Dr. Anisha Mawlong, ka HOD Radiation Oncology ka Civil Hospital Shillong bad kiwei kiwei pat.
Haba ai jingkren ha katei ka sngi shaphang ka jingïaid lynti jngai jong ka jylla Meghalaya ban ïaleh pyrshah ïa ka jingpang bampong, ka Dr. Anisha Mawlong, HOD Radiation Oncology-Civil Hospital Shillong Member Secretary-State Cancer Society of Meghalaya, ka la ïathuh ba ka jaka ai jingsumar bampong lane ka Oncology Department hapoh Civil Hospital Shillong la sdang ïa ka jingai sumar na ka kamra kaba rit ha ka mala barim jong ka Civil Hospital. La pyntreikam ïa ka OPD bad ka Radiation Therapy na ki artylli ki kamra, bad ki la don tang kumba 15 tylli ki jingthiah ha kaba kiba bun na ki nongpang la hap ban phah thiah ha ki lynti ïaid tang ban ïoh ïa ka jingsumar bad kitei ki nongpang ruh ki la kloi ban leh ïa kata.
Ka Dr. Mawlong ka la ïathuh ba ka East Khasi Hills ka dei kaba ïoh bat ïa ka kyrdan kaba nyngkong eh ban ïoh ïa ka jingpang bampong lyngba ka jingdih duma.
Ka la ïathuh naduh u bnai Ïaïong 2023 haduh u Kyllalyngkot 2024, ki la don haduh 153 ngut ki shynrang bad 146 ki kynthei kiba la wan ban leh ïa ka screening ha Civil Hospital Shillong ha kaba napdeng kine, 74 ngut ki dei kiba don ïa ka jingpang bampong bad lyngba ka jingdon ki nongpang haduh 74 ngut ka long kaei kaei kaba sngewsih bha.
Shuh shuh ka Dr. Mawlong ka la ong ba ka long kaba donkam ban ïatreilang bad ïasnohkti lang da kaba leit phah sumar kham kloi namar ka jingpang bampong ka dei ka jingpang kaba lah ban pynkoit lada lap kham kloi ïa ka jingpang.
Na ka liang ka Dr. Mazel Ampareen Lyngdoh, haba ai jingkren ha katei ka sngi, ka la ban jur halor ka jingdonkam ban ïatylli hapdeng ki briew kiba ïadon bynta lang ban ïakhun ïa ka jingpang bampong.
Ka Myntri ka la ban jur ïa ka jingdonkam ban ïakren-ïathir bad a jingai jinghikai shaphang ka MHIS ka ban ai jingïarap ha ka liang ka bai sumar sha ki longïing-longsem jong kiba shah ktah ha ka jingpang.
“Nga kyrpad ïa baroh kiba don bynta lada ngim ïatylli, kane ka jingïaleh kan dang wan jia ban ïakhun bad ngi. Ngi dei ban sangeh ka jingïakren-ïathir, ngi donkam ban leh ei-ei. Ka Meghalaya Health Insurance Scheme (MHIS) ka dei ban kot sha baroh ki longïing-longsem kiba shah ktah ha ka jingpang bad sha uno-uno uba shah ktah ha ka jingpang bampong. Ka jingpyntikna ba ka lad ai jingïarap ka long kaba donkam ban ai lyngba ka pisa na ka bynta kito kiba ïoh ïa ka jingpang bampong. Ka jingïada ka long kaba donkam bad ka jinglap kham kloi ïa ka jingpang ka long ka jingïarap ka ban ïaleh pyrshah ïa une u khñiang jingpang. Baroh ki nongshong shnong jong ka jylla ki dei ban laitluid na ka jingkit kaba khia haba ki leit ban phah sumar ïa ka jingpang bampong bad ki nongpang ki dei ban sngewshngaiñ haba ki leit sumar”, la ong ka Myntri.
Shuh shuh ka Myntri ha katei ka sngi ka la sam ruh ïa ki Mobile Endoscopy Units kum shibynta ka Meghalaya Mission Cancer Prevention and Early Detection bad ka la plie ruh ïa ka Promotional Video jong ka Cancer Care Project kaba nyngkong.
Nalor kitei ki nongai jingkren, la ïoh ruh ïa ka jingkren na u Joram Beda, IAS, Commissioner & Secretary ka tnad ka koit ka khiah, Prof. (Dr). Nalin Mehta, Director ka NEIGRIHMS.
Ha katei ka sngi, la ïoh ruh ïa ka jingkren na ki nongphla kiba la pynpaw ïa ka jingjop bad ka jingkoit na ka jingpang bampong.
