Shillong, Rymphang 13
Ka Border Security Force (BSF) ka la kam ba ka jingkynnoh jong u doktor ka tnad Veterinary, Dr. Seiboklang Buam pyrshah ïa ki shipai ka tnad ka long ka bym don nongrim bad kaba ïalam bakla.
“Ka jing kynnoh jong utei u briew ba ki shipai BSF ki la byrngem ban siat bad pynlaw lyngkhuit ïa u ka long ka bym don nongrim bad kaba ïalam bakla pyrshah ïa ki shipai BSF,” la ong ka kyrwoh na u PRO, BSF-Meghalaya.
Ka kyrwoh ka ong ruh ba ki shipai BSF kiba don ha thaiñ khappud ki ïada ïa ki paidbah kiba sah hajan ki jaka khappud bad kumta kitei ki jingkynnoh bym don nongrim ym tang ba ki buh jingma ïa ki shipai hynrei ka wanrah ruh ïa ki jingïakynad kaba lah ban ïa kiar.
“Ha ka 11 tarik Rymphang, 2024 ha ka por 12:05 shiteng sngi, ki shipai BSF kiba don ha thaiñ khappud India bad Bangladesh ha Hawaitila ki la ïohi ïa uwei u briew uba ïaid lynti sha Lakroh Nala, kaba jan bha bad ka khappud bad ka ri Bangladesh. Haba ki shipai BSF ki la pynsangeh ïa u, u la pynpaw ka jingbym sngewtynnad ïa kane ka jingjia bad u la shim ïa kane kum ka jingktah ïa ka burom shimet jong u namarba u kam ba u dei u doktor Veterinary ha ka thaiñ,” la ong ka kyrwoh.
Ka kyrwoh ka ong ruh ba haba utei u doktor u la shah pynsangeh ha ki shipai BSF, u la sdang ban ring dur ïa ka thaiñ khappud bad ïa ki shipai (BSF) kiba don ha ka kam.
“Hapdeng ki jingkyrpad jong ki shipai BSF ban sangeh ka jingring dur, une u briew um shym la sngap ïa ka jingkyrpad jong ki. Hadien kane, utei u doktor Veterinary u la mih noh na kane ka jaka da kaba byrngem tyngeh ruh ïa ki shipai BSF ba don hapdeng ka kam. Hadien katto-katne por, u la wanphai ryngkat bad katto-katne ki nongshong shnong bad hylla pyrshah ïa ki shipai BSF bad ring dur ban pynjah burom ïa ka kynhun shipai,” la ong u PRO ha ka kyrwoh.
Halor katei ka jingjia, ha ka 12 tarik, Rymphang ha ka por kumba 4 baje janmiet la pynlong ïa ka jingïalang ha ophis SDO (Civil) Amlarem ba la pynïaid da u Dr. Abhishek Saini, IAS, ryngkat u SDPO Amalarem Sub- Division, Dr. Seiboklang Buam, SHO PS- Muktapur bad ki heh shipai BSF.
Ha katei ka jingïalang la pyni ïa ki jingshisha jong katei ka jingjia (kiba la pynpulom lut ïa ki jingkynnoh) bad kumta la pynbeit ïa katei ka kam.
Shuh shuh ha katei kajuh ka sngi ha ka por kumba 5 baje janmiet la pynlong sa kawei ka jingïalang, ha kaba la ïadonlang u MLA ka thaiñ, Bah Lahkmen Rymbui, Chief Advisor sha ka Sorkar Meghalaya, Additional Home Secretary Sorkar Meghalaya, IG Law & Order ( Meghalaya Police), IG Border bad IG BSF Meghalaya ban ïakren shaphang katei ka jingjia.
U Inspector General of BSF Meghalaya, hadien ba u la pynpaw ïa ki jingshisha halor katei ka jingjia, u la kular ha ka jingïalang ba ka BSF ka ïeng skhem na ka bynta ka jingshngaiñ jong ka ri wat hapdeng ki jingeh bad ki shipai BSF ki ai ka jingshakri na ka bynta ka ri.
