Maham ka JNC ïa ki kali kit palat pud ban ïaid lyngba ka jingkieng Ri Manar

Shuh shuh u la ong ba ka seng ka la dep phah jingthoh sha ka tnat PWD ban maramot noh ïa ka jingkieng hynrei haduh mynta ka tnat kam patiaw satia.

Khliehriat, Rymphang 13

Ka Jaiñtia National Council (JNC) Sumer Circle ka la maham ïa ki kali kiba kit palat pud ban ïaid lyngba ka jingkieng nar kaba tip kum ka Ri Manar kaba don ha Elaka Sumer ha East Jaiñtia Hills.

Ha ka kyrwoh ba la pyllait, ka JNC ka la ong ba kane ka jingkieng ka don mynta hapdeng ka jingtlot kaba jur bad katkum ki dak ki shin ba paw la sakhi ba ki screw ki baltoo ki la sdang tlor noh na ka jingkit palat pud ki kali heh.

Nalor nangta, ka seng ka la ong tang na ka jingïaid ki kali ruh la mih ka jingsawa ba shyrkhei bha na kane ka jingkieng bad kane ka buh ka jingma kaba khraw haduh katta-katta ïa ki nongleit nongwan.

Nalor kata, ka seng ka ong ba na ka por sha ka por ka pynkynmaw ba ym dei shuh ban ïaid na kane ka jingkieng haba ka jingkit ka kot sha ki 40 lane 50 ton katba ka kot bor pat tang 8 lane 9 ton.

Namar kata, ka JNC ka kyrpad ruh ïa ki nongshong shnong ka thaiñ ba kin ïatreilang bad lada lap ïa kino-kino kiba leh pyrshah yn leh da kaba tyngeh, la ong u President ka Circle u Sakilan Chyrmang.

Shuh shuh u la ong ba ka seng ka la dep phah jingthoh sha ka tnat PWD ban maramot noh ïa ka jingkieng hynrei haduh mynta ka tnat kam patiaw satia.