Shillong, Rymphang 19
U President ka National People’s Party (NPP) Meghalaya u Bah Prestone Tynsong u la ong ba ka NPP ka dei ka seng kaba pynshlur ïa ki khun samla ba kin nang ban kren ïa bun tylli ki ktien ym tang ïa ka ktien Khasi.
“Phi dei ban nang ban kren bun tylli ki ktien. Nga la babe kylla ba ngam nang kren ktien Hindi, nga kwah ban pule hynrei kat nang pule nang sniew bok bad nang king ka khlieh, hynrei ha ki khun ki kti ki jong ngi, nga kwah ban pynshlur ba phin nang kren Hindi, ym tang ka Hindi hynrei kiwei kiwei ki jait ktien,” la ong u Bah Prestone haba kren ha ka jingïalang pdiang ïa ki ar ngut ki MDC bad uwei u MDC barim sha ka seng NPP ha shlem treikam ka NPP ha Lachumiere ha ka Lah Sngi U Blei.
U Bah Prestone uba dei ruh u Symbud Myntri Rangbah ka jylla u la ong, “Nga ïohi ba ki don ki seng kiba ong wat kren kiwei ki ktien bad wat tang ban kren Garo ruh ym long hana bad dei ban kren beit tang ktien Khasi, nga sngew synei lada don ki nongïalam na Garo lada ki ong ym bit ban kren ktien Khasi, kaei ka ban jia,” u la ong bad bynrap ba ka nongrim ka NPP ka ïeng ha u païa uba dei tang uta u païa lada u khih ka pyrthei kan ngam jyllop, kata ka païa ka long ka riti synshar ka Ri India. Ha kawei pat ka liang u la ong, ka NPP ka ïeng na ka bynta ka jingïatylli jong ki rit paid, bad ym dei shuh tang ha Meghalaya ne ha ki jylla ka thaiñ shatei lam-mihngi hynrei ha ka ri India baroh kawei.
U la ong ba dei tang ka NPP kaba don ka mat ban wanrah ka jingïalong kawei jong ki paidbah rit paid, ha kaba wat u mama Modi (Narendra Modi) ruh u tieng u smiej bad burom ïa ka NPP.
