Shillong, Rymphang:
Ka tnad Information & Broadcasting ha ka jingïatreilang bad ka Prasar Bharati bad UNESCO kan pynlong ïa ka ‘Capacity Building Workshop’ na bynta ki Akashwani bad Community Radio Station ban kyntiew ïa ki ktien tynrai ha nongbah Shillong ha ka 20 bad 21 tarik Rymphang, 2024.
Ha kane ka ‘workshop’ yn ïashim bynta da 15 tylli ki ‘Community Radio Station’ jong ki jylla ka Thaiñ Shatei Lam Mihngi bad 16 tylli ki ‘Akashwani Radio Station’.
Ka jingthmu jong kane ka ‘workshop’ ka long ban kyntiew ïa ki ktien tynrai lyngba ki ‘Radio Station’ lyngba ka jingai jinghikai ban wanrah ïa ki prokram ha ka ktien tynrai.
Ha kajuh ka por, la pynlong ïa ka ‘workshop’ ha ka jingïatreilang bad ka UNESCO ha kaba ïadei bad ki kam teknikal, kaba don hakhmat eh ban kyntiew ïa ki ktien tynrai ha kylleng ka pyrthei bad la ithuh ïa ka bynta ba kongsan jong ki ‘Radio Station’ban kyntiew ïa ki ktien tynrai bad ka deiriti kaba ïar.
Ka ‘Indigenous Peoples Cultural Heritage’ jong ka UNESCO, bad ka ‘Intellectual Property Programme’ ka thmu ban kyntiew ïa ka jingïada bad pynthymmai ïa ki ktien tynrai bad ki deiriti, lyngba ka ‘Community Medïa’.
Ka bynta jong ka Akashwani, ka nongai jingpyntip ïa ki paidbah, ha ka jingïada ïa ki ktien bad ka deiriti ka dei kaba la ithuh. Ki ‘Community Radio Station’ kiba pynïaid da ka imlang-sahlang ki plie ka rynsan ban pynsngew ïa ki sur tynrai hapdeng ki jaidbynriew jong ka thaiñ halor ki jingeh ba ïadei bad ka koit ka khiah, ka bam ba tei met, ka pule puthi, ka kam rep bad kiwei-kiwei.
Shuh shuh, namar ba ka prokram ka dei ha ki ktien tynrai, ki briew ki lah ban sngewthuh kham bha. Ka jingwanrah ïa ki prokram ‘radio’ ha ka ktien tynrai ym tang ba kan pynneh pynsah ïa ka ktien hynrei ïa ka deiriti ruh kaba kongsan bha.
Ki don bun ki ktien tynrai ha ki Jylla ka Thaiñ Shatei Lam Mihngi bad kane ka ‘workshop’ ka long kawei ka ban ïaid shaphrang ban kyntiew bad ïada ïa ka ktien tynrai.
