Shillong, Rymphang 21
U Vice-President ka BJP, Bah Wankitbok Pohshna u la ong ba ka jingpynïasyriem ïa ka seng bad ka NPP ka long tang ka jingpynthame ban ïalam bakla ïa u paidbah ka Jylla.
“Dang shen ngi la ïohi ha ki kotkhubor bad ïohsngew sharum-shaneng ba ka BJP bad ka NPP ki dei kijuh. Kane ka jingpynïasyriem ïa ka BJP bad ka NPP ka long tang ka jingpynthame ban ïalam bakla ïa ki paidbah ka Jylla,” la ong u Bah Pohshna ha ka kyrwoh khubor.
U la ong ruh ba ka dei ka seng kaba burom ïa ka kolshor jong ka ri, kaba phaikhmat sha ki jingdonkam ban kyntiew ïa ki Jylla katkum ka rukom im jong ki nongshong shnong bad kaba lamkhmat ban kyntiew ïa ka roi ka par jong ka ri.
“Na ka bynta ka BJP, ka ri ka wan hakhmat duh bad ka trei borbah ban ai jingmyntoi ïa ki paidbah,” u la ong.
Haba kdew ïa ki skhim bapher-bapher kaba ka Sorkar BJP ka la wanrah sha ki paidbah kum ka ‘Ujala’, ‘Vishwakarma’, ‘PMAY’, ‘Atal Pension Yojana’, ‘Ayushman Bharat’ nalor kiwei-kiwei, utei u nongïalam u la buh jingkylli ba kiei kita kiwei pat ki seng kiba la lah ban wanrah ïa ki jingmyntoi na ka bynta ki paidbah – “Ym don, wat ka NPP ruh kan ym lah.”
U Bah Pohshna uba la pynsngew ba ka BJP mynta ka synshar ha 18 tylli ki Jylla bad Sorkar Pdeng kumjuh, u la ong, “Ban shu nujor, ka NPP tang ha kane ka Thaiñ Shatei Lam Mihngi ruh kam pat da don kyrteng – klet noh sha kiwei ki Jylla shabar ka thaiñ. Ka NPP ka dei kaba la mih na ka NCP kaba la pait na ka seng Congress ha kito ki snem.”
“Da kaba ong ba ka BJP ka dei ka NPP, ki klet ba ka pyrthei baroh ka tip ba u President ka BJP, dei u Jaggat Prakash Nadda bad u Myntri Rangbahduh ka ri, dei u Narendra Modi bad ym don uwei ruh u dkhot ka NPP uba lah ban tuklar ha ki kam pohïing jong ka BJP,” u la ong.
Utei u nongïalam u la bynrap ba ka NPP ka dei tang ka dkhot ha ka NDA ka Sorkar Synrop ba la thaw ha ki por ba la long Myntri Rangbahduh u Atal Bihari Vajpayee ba la khlad bad haba phai sha ka Jylla, ka BJP ka shu ai jingkyrshan ïa ka Sorkar Synrop ba la lamkhmat da ka NPP kumba leh lang kiwei.
Shuh shuh u la bynrap, “Ka BJP ka ïakhun hi marwei ha ki ilekshon bad kam ju donkam ban ïasynroplang bad kiwei. Ka seng ka la long kaba la khreh lypa ban wan biang sha ka bor synshar ha ka ri ynda la dep ka ilekshon MP.”
U la ïathuh ba hadien ka jingwanphai na ka lympung ïakynduhlang jong ka seng kaba dang shu dep shen ha nongbah New Delhi, ka BJP Meghalaya ka la nang ïaid shakhmat ban pynkhreh ïa ka ilekshon MP da kaba pynkhlaiñ ïa ki tnad ha ka Jylla bad ka la sdang ban pyntyllun ïa ki prokram ‘leit sha ki shnong’ bad ‘kynduh ïa ki paidbah’ ki ban long ki lad ban kynduh ïa ki nongthep ‘vote’ ban pynshai halor ki kam jong ka seng hapoh ka jingïalam jong u President ka seng hangne, u Rikman Momin.
“Katkum ka rukom ka ‘Central Parliamentary Board’ jong ka seng, kan sa ai ïa ka rai khatduh halor ki kyrtong ki ban ïoh ïa ka tiket na ka seng na ka bynta ka Shillong bad Tura,” la ong u Bah Pohshna.
