Shillong, Rymphang 21
U Myntri Rangbah ka jylla u Conrad K Sangma u la pyntip hapoh ka ïingdorbar halor ka jingtrei shitom bad ïakhun tyngeh jong ki pulit ban tehlakam ïa ka jingjyllei jong u drok hapoh ka jylla ha kaba la ïoh ban kurup bun bah u drok bad kurup ka pisa kaba jan kot klur tyngka.
U Conrad u la pyntip ïa kane haba jubab halor ka jingïatai ïa ka jingkren lamphrang jong u Lat ka jylla hapoh ka ïingdorbar. “Ka mat jong ka jingjyllei jong u drok ka dei shisha kaba la ktah bha bad ïa kaba kiba bun ki dkhot jong ka ïingdorbar ruh ki la pynpaw bad ïatai halor kane,” la ong u Conrad.
U la pyntip ba haduh mynta ki briew kiba la shah kem na ka kam khaïi drok ne kiwei ki jingdih ba sniew ki la long haduh 1600 ngut ha kaba 882 ngut ki dei kiba la shah mudui mukotduma, bad na kine haduh 696 tylli ki jingmudui la dep ban chargesheet.
Shuh shuh u Conrad u la pyntip ruh ba nalor ka jingïoh kem ïa ki briew, la ïoh ruh ban kurup bun bah u drok uba la kot sha ka 40,000 gram, haduh 11,000 kilo u kynja, 2700 gram u drok heroin, ka pisa kaba la jan kot sha ka T. 1 klur, ki mobile phone bad haduh 323 tylli ki kali.
U Myntri Rangbah u la ong ba wat la kane ka kam ka long kaba heh bad kiba bun ki briew ki ngop sha u drok hynrei ka jingïoh kem bad kurup ka pyni ïa ka jingtrei shitom jong ka tnat pulit kiba la ïakhun tyngeh ban khanglad bad tehlakam ïa ka jingjyllei jong u drok hapoh ka jylla.
U la ong ruh ba ka Sorkar ym tang ba ka ïakhun ban tehlakam ïa ka jingwan tuid jong u drok shapoh ka jylla hynrei ka la trei ruh kumno ban pyllait pat ïa kito kiba la kyrni ha u drok lyngba ki jingïasyllok. Na ka bynta kane, la pyntreikam ïa ka projek kaba la tip kum ka ‘DREAM’, ha kaba ym tang ka sorkar ka ban don bynta hynrei yn kynthup lang ïa baroh naduh ki nongïalam shnong, Balang bad kiwei kiwei.
