Shillong, Rymphang:
Ka sorkar jylla lyngba ka Ministry of Skill Development & Entrepreneurship & Ministry of Housing & Urban Affairs jong ka Sorkar Pdeng, ha ka 20 tarik u Rymphang, 2024 ka la pyllait paidbah ïa ka projek kaba la tip kum ka “Rashtriya Udyamita Vikas Pariyojana (RUVP)” ha Shillong College, Laitumkhrah.
La pynlong ruh ïa kane ka prokram hapoh ka Shillong College Conference Hall lyngba ka Indian Institute of Entrepreneurship (IIE) kumba la bthah lyngba ka Ministry of Skill Development and Entrepreneurship ka sorkar pdeng.
Ïa katei ka skhim la pyllait paidbah ha baroh kawei ka Ri India lyngba u Shri. Dharmendra Pradhan uba long u Myntri ka Sorkar Pdeng bad uba dei khmih ïa ka Ministry of Skill Development and Entrepreneurship lem bad jong ka Ministry of Housing & Urban Affairs, Sorkar Pdeng, na ka bynta ban ai ka jingkyrshan bad ïarap ïa ki nongdie madan (Street Vendors) kiba don hapoh ka Shillong City ba kin dang lah ban kyntiew shuh shuh kham shalor katkum ki dukan kaba ki pynïaid manla ka sngi kaba long kum ka kamai kajih hapdeng ban kyrshan na ka bynta ka longïing longsem jong ki shimet hapdeng ka jingduk bad ka jingkyrduh.
U Bah Bajop Pyngrope uba dei u MDC jong ka Rambrai Jyrngam Constituency bad uba long ruh kum u Chairman jong ka Regional Planning & Development Council, Sorkar Meghalaya, u la wan ban ïadon ryngkat lang ha kane ka prokram kaba la long ha katei ka sngi kumjuh ha ryngkat bad ka Dr. I. Kharkongor kaba long ka Principal jong ka Shillong College.
Ha kane ka sngi la ïoh ruh ban ïadonlang da ki spah ngut ki Nongdie Madan (Street Vendors) kiba la dep ban jied napoh Shillong kynthup naduh Police Bazar, Motphran, Mawlai, Laban, Laimer, Laitumkhrah, Polo lem bad kiwei kiwei ki jaka da ka jingshimkhia lyngba u Bah Banshai Marbaniang bad ka Kong Arti Lyngdoh kiba long kum ki IIE State Coordinator ba la thung da Indian Institute Entrepreneurship (IIE), Guwahati lem kumjuh da ka jingsynranlang da u Bah Churchil Syiemlieh uba long kum u Social Coordinator jong ka Jylla bad ha ryngkat lang ka Shillong Municipal Board (SMB).
