Shillong, Rymphang 22
Uwei u samla rangbah uba dei nongtrei mon sngewbha ha ka imlang sahlang, u Bah Lionel Nongkhlaw, u la ïoh ban leit ai jingïarap da ki kopi ïa ki khynnah skul jong ka Laitmawpen Lower Primary School kaba don ha ki thaiñ Tyrsad bad kaba hap ha Mawphlang konstitwensi ha ka 22 tarik u Rymphang.
Kane ka jingleit synñiang da ki kopi sha katei ka skul ka dei ka jingkyrpad ki nonghikai namar ki kmie ki kpa kiba bun kim kotbor ban thied kopi.
Ka kopi kaba u Bah Lionel u la sam ki long palat 700 tylli sha ki 96 ngut ki khynnah skul.
Haba ai jingkren ha ka jingïalang kaba lyngkot, u Bah Lionel u la pynpaw ka jingai khublei ïa ki nonghikai kiba la wan kyrpad ban noh synñiang, bad kumta kum u ‘riewshimet uba ju noh synñiang ïa ka imlang ka sahlang um kwah ban ïohi ba ki khynnah skul kin pep noh tang shiteng por namar u kwah ba ki khynnah kin nang kin stad ha ka jingim jong ki.
“Nga la ïoh ïa ka jingkyrkhu, nga kwah ba ngan ai lem ïa ka jingkyrkhu sha kiwei pat” u la ong.
Nalor kata, u la ai mynsiem ïa ki kmie ki kpa ba kam dei ka jingduk kan khanglad ïa ki hynrei ka jingtrei shitom kan long ka jingkyrmen kum ka jaidbynriew.
U la ong ba mynta u wan ai kopi sha ki khynnah skul hynrei shisien ka sngi haba un wan biang un ïohi ïa ki khynnah skul kin long kiba la nang la stad ha ka jingpule.
U Bah Lionel u la pyntip ba kine ki kopi kaba u la sam ka dei kaba u la leh ma u shimet khlem da donkam ka jingïarap na kiwei khnang ban sam lem ïa ka jingstad sha ki khynnah skul ha kane ka thaiñ.
