Shillong, Rymphang 23
Ka Jylla ka la ïoh ka jingujor ba don tang kawei ka jingleh benami.
Ïa kane la ïathuh da u Myntri Rangbah, u Conrad K Sangma ha Ïingdorbar ha ka kynta kylli jingkylli jong ka Dorbar Mang Tyngka ha ka Sngi Thohdieng halor ka jingkylli jong u MLA na Nongkrem u Bah Ardent Basaïawmoit.
U Bah Ardent u la kylli balei la lap tang kawei ka jingleh benami, u Myntri Rangbah u la ong ba ym dei ba lap, hynrei ka shong katkum ka jingujor da mano-mano kiba wan shakhmat.
Halor ka jingkylli u Bah Ardent ban don ka Committee ha man la ki district, u Myntri Rangbah u la ong ba ka Sorkar ka dang don ha ka jingthaw ïa ki kyndon mynta haba ïadei bad ka aiñ kaba la dep pynkylla.
U la ong ba kumba ju long, ïa ki kyndon hap ruh ban ïasyllok bad kiwei pat ki tnat treikam ka Sorkar bad shen yn sa pynmih noh ïa ki kyndon.
Halor ka jingkylli u MLA ka Mawryngkneng, Bah Heavingstone Kharpran, u Myntri Rangbah u la ong ba ïa ka jingujor halor ka jingleh benami lah ban phah lyngba u majistor (1st class) ne Superintendent of Police ha district.
Na ka liang u MLA ka Congress, Saleng A Sangma, u la ong ba lada shim khia bha ïa ka jingleh Benami, kan ïarap ruh ban khanglad ïa ka jingwan kiba nabar kiba wan ruh ban treikam lajong ne kam khaïi hangne ha Meghalaya.
Kumta u la ong ba wat ha ki khep ba ju khynra ïa ki laisen khaïi jong ki bar Jylla da ki District Council kum ka KHADC, la ïohi ba ki ju kynthih pynban da ki trai muluk nadien ban wan ïada ïa kito ki bar Jylla kiba pynïaid ïa ki kam khaïi da kaba shu leh benami ha kyrteng jong ki trai muluk.
Namarkata, u la ong ba lada shim khia shisha ïa kane, yn lah ban khanglad ïa ka jingwan kiba nabar sha kane ka Jylla, bad u Myntri Rangbah ruh u la ong ba ka Sorkar ka la buh jingmut haba ïadei bad kane ka bynta.
