Shillong, Rymphang 23
Ka MLA jong ka NPP na Sutnga-Saipung, Kong Santa Mary Shylla ha ka Sngi Thohdieng ka la ban jur ïa ka Sorkar Jylla bad ka tnad shipai Border Security Force (BSF) ban pyntikna ïa ka suk ka saiñ bad ka jingshngaiñ jong ki paid nongshnong shnong ki thaiñ khappud ka East Jaiñtia Hills namar ka jingwan rung be-aiñ jong ki nong Bangladesh shapoh India.
Ka Kong Shylla ka la ong ïa kane hapoh ïingdorbar thawaiñ haba wanrah ïa ka ‘Call Attention’ halor ka jingsuba pynïap ki nong Bangladesh ia uwei u nong India na bynta u kwai, kaba la mih ha kawei na ki rynsan lad pathai khubor ka Jylla.
Katei ka jingjia ka la jia ha ka 6 tarik u Kyllalyngkot mynta u snem ha Balisara, Loomsoski kaba hap hapoh Elaka Narpuh, East Jaiñtia Hills.
“Katei ka jingjia ka la wanrah ka jingsngewkhia halor ka jingshngaiñ jong ki briew jong ngi ha shi lynter khappud bad ha ki sawdong sawkun ka shnong Umkiang kumjuh ïa ki jingthung jingtep jong ki,” ka la ong.
Ka MLA ka la ong ruh ba hadien katei ka jingjia, ka la don ka jingsheptieng hapdeng ki nongshong shnong khamtam ki nongrep kiba don bri kwai ha ki khappud ka India bad Bangladesh.
“Ki nongshong shnong ki la ïathuh ruh ba ki nong Bangladesh ki rung laitlan sha India, ha ki sawdong-sawkun ka shnong Umkiang bad tuh ruh ïa u kwai na ki bri jong ki nongrep, ha kawei ka liang kaba wanrah ka jingduhnong kaba khraw ïa ki briew jong ngi,” ka la ong.
Haba pynpaw ka jinglyngngoh halor ka jingsuk ka rung ka mih jong ki briew ba nabar ri wat hapdeng ka jingdon jong ki shipai BSF ha khappud, ka Kong Shylla ka la ong ba ki paidbah ki la pynpaw ka jingsngewkhia halor ka jingbym larkam ka BSF ban ïada ïa ki khappud bad ki jingthung-jingtep jong ki naba kitei ki briew ki rung laitlan sha ka jaka jong ki khlem jingtieng.
Ka la ong ruh ba namar ka jingtieng ïoh shah tuh u kwai ha ki nong Bangladesh, bun ki briew kim banse ban hap ban buh da la ki jong ki nongap pahara ban ïada ïa u mar jong u.
“Ka don ka jingdonkam ban pyntikna biang ïa ki briew jong ngi ha khappud ba ka Sorkar bad BSF kin iada ban pyntikna ïa ka jingshngaiñ jong ki,” ka la ong.
Ka la bynrap ba ka jingshngaiñ jong ki briew bad ki jingdon-jingem jong ki, ki don hapdeng ka jingma khamtam hadien katei ka jingjia bad kumta ka dei ka kamram ka Sorkar bad BSF ban pyntikna ba ki khappud ki long kiba shngain.
U Symbud Myntri Rangbah ka Jylla ba khmih ïa ka tnad kam pohiing, Bah Prestone Tynsong, u la ong ba ia katei ka jingjia la pynngat mukotduma hapoh thanat Lumshnong bad na ka liang u Superntendent of Police ka East Jaiñtia Hills u la dep pynsngew ïa kane sha ki bor ba dei khmih ka BSF ha ka 10 tarik u bnai ba la dep ba kin ïakren bad ka Border Guard Bangladesh (BGB).
U la ong ruh ba kum shi bynta ban tehlakam ïa ki kam sniew ha ki khappud ka India bad Bangladesh, ka shlem treikam Deputy Commissioner, West Jaiñtia Hills ka la pynmih ïa ka hukum ha ka 31 tarik u bnai ba la dep ban khang ïa ka ïaid ka ieng jong ki briew ha ki jaka khappud da ka jingthmu ban wan rung shapoh India nalor kiwei-kiwei.
Shuh shuh u Bah Tynsong u la ïathuh ba ka tnad pulit ka Jylla ka la shim ruh ki sienjam bapher-bapher na bynta ka jingshngaiñ jong ki nongshong shnong kiba shong ba sah ha ki khappud bad ka Bangladesh da kaba pynïeng ïa 13 tylli ki thanat hajan ki khappud ka India bad Bangladesh ha ryngkat 19 tylli ki khyrdop peitngor ha shi lynter khappud.
