Tura, Rymphang 26
Ki nongtrei ka Garo Hills Autonomous District Council (GHADC) hapoh ka jingïalam jong ka Non Gazetted Employees’ Association (NGEA) ha ka Lah Sngi U Blei ki la sdang ïa ka jingïakhih kaba lai sngi ban dawa na ki bor ba dei khmih ban pyllait noh ïa ka tulop kaba khlem pat siew la 32 bnai mynta.
Kane ka jingïakhih ka la sdang ha ka madan jong ka Tura Government College ha Tura hadien ba ki bor ba dei khmih ka GHADC bad bor distrik ki khlem ai jingbit ïa kitei ki nongtrei ban ïakhih ha shlem treikam jong ka GHADC ha Hawakhana.
“Ngim banse ban pynlong da ka jingïakhih namar ngi la shah ktah jur namar ka jingbym ïoh tulop. Ki khun jong ngi ki donkam ban leit sha ki skul bad kolej bad ngin hap ban siew ïa ka bai pule jong ki nalor sa kiwei pat ki jingsiew,” la ong u President ka NGEA, u Brithen Sangma.
Katba ki nongtrei ki la sdang ban pynlong ïa ka jingïakhih, ki bor ka GHADC ki la phah da ki shithi jong ki. Kine ki shithi ba la phah sha ki nongtrei ki la bthah ba ki dei ban wan trei naduh ka Sngi Ba-ar.
Lada kitei ki nongtrei kim leh kumba la bthah, ki bor ka GHADC kin sa shim da ki sienjam ba tyngeh pyrshah ïa ki nongtrei kiba la don pura ha ka kam. Na ka bynta kito ki nongtrei ba shipor, yn pyllait noh syndon ïa ki na ka kam ka jam kaba ki trei.
Katei ka jingïakhih ka dei ban bteng haduh ka Sngi Balang.
