Shillong, Rymphang 27
U Pa’iem K.M Syiemlieh uba dei u Deputy Syiem jong ka Hima Nongkhlaw, u la ïathuh ba dei u Tirot Sing uba hiar thma nyngkong ïa ki shipai phareng hapoh ka ri India haduh ba un shah kem ha ki shipai phareng bad shah set byndi ha Dhaka kaba dei ka nongbah jong ka Bangladesh mynta.
U Pa’iem Syiemlieh u la ong ba kum ka Kur Syiemlieh ka la ai khublei ïa ka sorkar jylla kaba la lah ban tei ïa u mot jong u Tirot Sing u Syiem ka Hima Nongkhlaw hadien ba u la shah set byndi ha ki shipai phareng ha ki por mynshwa.
U la ïathuh ba kane ka jingshah set byndi ka dei hadien ba u la hiar thma ïa ki shipai phareng ha ka 4 tarik Ïaïong, 1829 kaba la ïoh ban pynïap palat 60 ngut ki shipai phareng ha ka jingïakhun ïa ka thma namar ka jingpynkheiñ ïa ka jingïateh hapdeng u Tirot Sing bad u David Scoot ha kito ki snem.
“Nga la poi sha Dhaka mynshem snem ha ka 16 tarik Jylliew, 2023 hynrei ngam ïoh ban rung sha jaka set byndi ïa u Tirot Sing, hynrei ha kine ki sngi ba la leit buh ïa u mot Tirot Sing ha Dhaka ki nongïalam jong ka sorkar jylla ki la ïoh ban ïuh-kjat ha patok ba la set byndi ïa u Tirot Sing ha Dhaka tangba mynta ki la pynlong kum ka jaka pynsahnam” u la ong.
Nalor nangta, u Pa’iem Syiemlieh u la ïathuh ba u Tirot Sing u dei u Syiem ba shiphew ha ka Hima Nongkhlaw bad hadien u Tirot Sing kiba long Syiem na ka Kur Syiemlieh ki long u Rijon Sing bad mynta ha u Pa’iem Phrestar Syiemlieh bad ma u kum u Syiem khynnah.
Shuh shuh u la pynpaw ka jingsngewkmen ban ïoh leit buh ïa u motdur jong u Tirot Sing ha Dhaka namar dei ma u uba nyngkong ban hiar thma ïa ki phareng hapoh ka ri India.
Kum ban shu pynkynmaw ïa u Motdur jong u Tirot Sing la ïoh ban leit plie ha ka 16 tarik u bnai Rymphang ha Dhaka da u Symbud Myntri Rangbah ka jylla, Bah Sniawbhalang Dhar bad ki MLA, ki ophisar, u Syiem ka Hima Nongkhlaw ryngkat kiba shah khot sngewbha.
