Jowai, Lber 01
Wat la ka Election Commission of India (ECI) kam pat pynbna ïa ka tarik ilekshon sha ka Lok Sabha hynrei ki seng saiñ pyrthei ki la sdang khie khohreh ban pynkhreh ïalade na bynta kane ka ilekshon.
Mynta ka kynti, ka United Democratic Party (UDP) West Jaiñtia Hills District ka la sdang ïa ka jingpynkhreh da ka jingïakynduhlang jong ki nongïalam bad dkhot nongkitkam na baroh 5 tylli ki konstitwensi ba hap hapoh West Jaiñtia Hills District ha ka 1 tarik Lber hapoh Community Hall jong ka Dorbar Shnong Loomsooiung, Newhill, Jowai.
Ha kane ka jingïalang, la donlang u MLA ka Khliehriat, Bah Kyrmen Shylla, MLA ka Mowkaïaw, Bah Nujorki Sungoh uba dei ruh u General Secretary ka UDP-WJHD, ki MDC ka UDP kynthup u Bah Winning G. Sungoh, Bah Finelyness Bareh, Bah Dawan Lyngdoh, J. Treilang Suchiang bad Lomris Lyngdoh.
Haba pynïaid ïa ka jingïalang, u Bah Lahkmen Rymbui u la ong, ka jinglum lang ka seng ïa ki dkhot nongkitkam ka long ban phylliew jingmut kumno ban pynsngewthuh sha ki paidbah ban ai jingkyrshan ïa u kyrtong ka kynhun Regional Democratic Alliance (RDA), u Bah Robertjune Kharjahrin sha ka ilekshon Lok Sabha na Shillong Parliamentary konstitwensi.
U la ong ba kiwei ki kyrtong ki mih na kamra klas sha u paidbah, katba u kyrtong jong ka RDA u la shakri da ki phew snem ïa ka ri bad ka jaidbynriew bad u sngewthuh kham bha ïa ka jingeh jingshon jong ki paidbah, kumta ka la dei ka por ban ai lad ïa u na ka bynta ban long u ksiang ban ïasaid ïa ki mat ba ktah ïa ka jaidbynriew bad ïa ki jingdonkam jong ki paidbah Khasi-Jaiñtia.
U Bah Kyrmen Shylla u la pynpaw ba u ngeit skhem ba ka UPD ha ki sngi ban wan kan long hakhmat eh hapoh ka Jylla, bad ha kata ka por kan long ka jingkyrkhu bad jingmyntoi ïa ki paidbah khamtam kito kiba ieid bad shaniah ïa ka seng. U la ong ka jingïakynduh mynta ka sngi, ka long ruh ban pynkhie im shuh-shuh ïa ka UDP hapoh Ri-lum Jaiñtia khamtam ha West Jaiñtia Hills khnang ba ka seng kan ïoh ïa ka jingjop ha baroh ki ilekshon kynthup ka ilekshon MP.
U la ong kiwei ki seng ki la ïoh ban mihkhmat ïa ka Jylla shapoh Delhi hynrei ka UDP wat la ka pynïeng kyrtong man ka ilekshon MP kam pat ju poi ha ka thong. Kumta u la kyntu ïa ki paidbah Khasi-Jaiñtia ban ai lad ïa u kyrtong ka RDA ha kane ka kynti ban leit mihkhmat sha Delhi ban wanrah ka jingkylla hapoh ka Jylla.
U Bah Nujorki Sungoh u la kyntu ïa baroh, haba jied ïa ki nongmihkhmat dei ban jied da u briew uba lait ka ktien ka thylliej ban pynsngew sha ka Sorkar Kmie ïa ka mat bad jingdonkam jong ki paidbah. Ha kane ka jingïalang u Bah Nujorki u la ai jingmut ruh ban thaw da kawei ka ‘Special Committee’ kyrpang na bynta kane ka ilekshon MP 2024.
