Shillong, Rymphang:
Ka Japan International Cooperation Agency (JICA) ka la dep ban ïasoi bad ai jingmynjur ban ai ram halor ki ar tylli ki Project na ka bynta ka jylla Meghalaya, kum shi bynta ban kyrshan ïa ka thaiñ Shatei-Lam-Mihngi lyngba ki Project shna surok ba la tip kum ka North East Road Network Connectivity Improvement Project.
Kane ka jingmynjur ban ai ram na ka bynta kine ki projek la ïasoi hapdeng u Vikas Sheel, Additional Secretary, ka tnad Economic Affairs, jong ka Ministry of Finance bad U SAITO Mitsunori, Chief Representative, JICA India. Kane ka ram ba la ïa mynjur la mang haduh JPY 34,537 Million bad la ïasoi na ka bynta ka Northeast Road Network Connectivity Improvement Project (Phase 3) (II), ban ai jingkyrshan na ka bynta ban shna ïa ka jingkieng bajrong tam ha India, kata ka jingkieng Dhubri-Phulbari, kaba pynïasoh ïa ka jylla Assam bad Meghalaya na shiliang sha shiliang jong ka wah Brahmaputra River. Sa kawei pat ka ram ba la mang ka long kaba kot haduh JPY 15,561 Million yen (kaba long ka kumno kumno 877 klur ka pisa India) la ïasoi bad ka sorkar India na ka bynta ka Northeast Road Network Connectivity Improvement Project (Phase 7). Ka jingthmu jong kane ka projek ka long ban pynbha ïa ki surok bah National Highway 127B (NH127B) na Phulbari sha Goeragre ha ka jylla. Haba kren ha katei ka sngi, u SAITO Mitsunori, Chief Representative jong ka JICA India Office u ong, “Ka jingkyrshan jong ka JICA ïa ka North East Road Network Connectivity Improvement Project Phase 3 (II) & Phase 7 ka pyni ïa ka jingtrei ba radbah jong ka ban kyntiew ïa ki kam pynroi kiba ïai neh bad ban kyntiew ïa ka thaiñ ha baroh ki liang. Kumba ngi sngew kmen ïa ka jingïaid sha khmat jong ka jingtei ïa ka jingkieng Dhubri-Phulbari, kaba long ka jingkieng ba jrong tam ha India, ka shi lynter jong ka jingkieng hapdeng ka Phulbari bad Goeragre (Phase 7) kan pynïasoh ïa ki jaka kiba don ha Mihngi bad Sepngi sha ka thaiñ khappud jong ka Daluin ha Meghalaya. Shisien ba la dep ïa kane ka jingtei ka thaiñ kan ïoh ïa ki lad ki lynti ban long kum ka thaiñ kaba lah ban leh ïa ki kam khaïi pateng lyngba ka jinglah ban pynïasoh bad kiwei ki ri ba marjan. Ban lah ban pyntreikam ïa kane ka projek ha ka rukom kaba jop ka donkam ïa ka jingïatreilang na ki shnat bapher bapher kum na ka liang jong ka Meghalaya Public Works Department (MPWD), National Highways & Infrastructure Development Corporation Ltd. (NHIDCL), ka sorkar Meghalaya bad na ki shnong ki thaw.”
