![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang:
Kawei ka longkmie kaba shong die jingdie ha ki thaiñ ka la ong ba ka jingwan pynpra ka HYC ïa ka jaka sah be-aiñ ki poiwir kaba don ha Lum Survey ka long kaba dei eh bad kaba bha tam ïa ka Jaitbynriew lajong.
Ka la ong ruh ba mynshwa ka sorkar ïa ki Khasi kiba bylla hok bad trei shitom ka la kyndang bad ka la shoh la dat naphang khlem jingmap haba ki shong die jingdie harud surok ha kaba ki long kum ki nongtuh. Kaba lyngngoh ka long balei ïa kitei ki poiwir kiba shong be-aiñ kam lah ban kyndang?
“Ka HYC ka leh ïa kaba bha tam na ka bynta ka Jaitbynriew jong ngi, ym dei ba ka ong ba ka leh shiliang ïano-ïano hynrei wat la ka sorkar la ïohi ba ka leh shiliang hynrei ka HYC ka la leh ïa kaba bha tam”, la ong katei ka longkmie.
Katei ka longkmie ka la ther ruh ïa ka sorkar kaba lehse ka don eiei sha lyndet namar kat ïa kiba bylla hok tang shu kren ka ktien mar-mar ka lah wan ban kyndang naphang hynrei haduh mynta kiba sah be-aiñ ha Them Metor kam lah ban weng
Katei ka longkmie ka la ong ruh ba ha ki por kiba mynshwa ha ka por ba ki shong jingdie da ki kriah ki lah shah beh, shah shoh bad shah rah sha thanat kumto ba ki dei ki nongtuh, katba ïa kine ki poiwir pat kiba wan sah beaiñ ha katei ka jaka, ka sorkar pat kam lah ban leh eiei satia ïa ki.
“Ngi la shah leh bad mynshwa ha ka por ba ïakhih hangne, ka sorkar ïa ngi ka la pynshitom bad ka la wan beh wat haba ngi kit da i kriah ruh ban die jingdie ka la wan shoh bad tynrong ha kali kumto ba ngi tuh ngi thiem bad ki la leit set sha thanat ruh, hynrei balei pat ïa kine kim lah ban weng kiba shu shong aram hangne”, la ong katei ka longkmie. Shuh shuh katei ka longkmie ka la ong ba ka jingbym leh eiei jong ka sorkar ban weng ïa kitei ki poiwir na katei ka jaka ka dei ba ka la ïoh mluh nadien-nadien, na kata ka daw ka la pynlong ïa ka sorkar ba kan sngap man-man halor kane kumba long ka mat Them Metor kaba long ka mat kaba la da ki phew snem la ïakhih ban weng ïa ki briew kiba shong ba sah ha katei ka jaka.
“Da dei ïa ki bar jylla kam leh hynrei ïa ngi ki Khasi ka la leh kloi-kloi bad mar sien kren ka ktien, ka kam ruh ka lah long hynrei ïa kiwei te kan nym leh namar ka ïoh nadien. Ka kren nakhmat hynrei ka shim nadien bad kane ka long ka sorkar kaba noh shiliang bad ki rit ki ria ki dang sahdien bad jynjar”, la bynrap ka longkmie.