New Delhi, Jylliew 23
U Myntri Rangbah ka Jylla, u Conrad K. Sangma u la leit jngoh ïa ka dukan die soh bad jhur ne ka ‘Safal Outlet’ ha New Delhi, ka ‘Retail Chain’ da ka Mother Dairy Fruit and Vegetable Pvt. Ltd.
Kane ka jingleit jngoh ka long kum shi bynta ban kyntiew ïa ki mar-rep jong ka Jylla.
U Sohtrun uba la thung khlem ai dawai napoh ka Jylla, ïa uba la bna nam ruh na bynta ka jingthiang jong u ha ryngkat ka ‘Brix Value’ kaba 16 haduh 18+, u long u soh uba kyrpang ïa ka Jylla.
Ïa une u soh la bna nam namar ka jingbang bad ka jingphalang jong ka rong ksiar-stem jong u. Ynda haba la ih bha, une u soh um don ksai shuh bad u long ruh uba bun um bad uba shngaim ha kajuh ka por, ha ryngkat ka jingduna ka ‘Acid’ kaba 0.6-1.2%.
Ïa une u soh la pynkit sha ki ïew ha kylleng ka ri bad shabar-ri kumjuh ha ryngkat jingjam na shiliang sha shiliang jong ki wah bad ka jinglong-jingman ka jaka, da kaba hiar arsut nalor lum ban poi sha ki jaka ïew ha kylleng ka India.
Haba ïadei bad kane, la pynïeng ruh ïa ka IQF (Individual Quick Freezing) ha Umdihar Cooperative Society, ïa kaba la pynmih palat 250 MT u Sohtrun, bad ka jingpynkhreh ban pynmih shuh palat 600 MT mynta u snem, lyngba ki kynhun nongrep bapher-bapher ha Ri-lum Khasi bad Garo.
Ha kane ka jingleit jngoh, la pdiang sngewbha ïa u Myntri Rangbah da u Manish Bandlish, Managing Director ka Mother Dairy Fruit and Vegetable Pvt. Ltd.
Na ka liang u Sangma u la ong, “Ka Meghalaya ka pynmih bun bah u Sohtrun bad kiwei-kiwei ki jait soh. Hynrei ka jingeh ka long ban pynïaid ïew bad ban pynïasoh ïa ki bad u nongthied ba khatduh. Namarkata, ka Sorkar Jylla ka la shim ïa kiba bun ki sienjam ha kine ki lai snem ba la dep, ba kynthup ka jingpynlong ïa ki prokram kum ka ‘Pineapple Festival’ ha Delhi ha u snem ba la dep, bad ka ban sa pynlong biang mynta u snem.”
U la ong ruh ba nalor kane, ka Jylla ka ïatehlok bad kiwei ki dukan lem bad ki kynhun kiba don ïa ki dukan heh ha kylleng ka ri ban pyntikna ïa ka jingpynïaid ïew bad kiwei-kiwei ki jingpynbit-jingpynbiang.
“Kumba ka long mynta, ka jingdon jong u Sohtrun ka Jylla ha ‘Safal Outlet’ ka dang long ka jingpyrshang ha ryngkat ka jingsdang kaba 250 kilo. U Bandlish, Managing Director ka Mother Dairy, u la ïathuh ïa nga ba ka jinglong-jingman ka long kaba biang palat, bad ngi sngewkmen ban warnah shuh ïa ki mar-rep jong ngi sha ka ri baroh kawei.”
Ka ‘Safal’ ka la wanrah ïa u Sohtrun ka Jylla na Muktidata Multipurpose Cooperative Society kaba ha Tikrikilla, West Garo Hills, na bynta ka ‘Customer Sensory Testing’ ha ki dukan jong ki.
Ki nongthied ki la pynsngew lane ai ka jingkynthoh kaba bha halor ka jinglong-jingman bad ka jingbang jong u Sohtrun Meghalaya.
Na ka liang u Managing Director ka Mother Dairy Fruit and Vegetable Pvt. Ltd, u la ong, “Ka jingdon lang u Sohtrun na ki jaka lum ka Meghalaya ka nang pynbha shuh-shuh ïa kiwei pat ki mar jong ngi, ngi khmih lynti ban ïatreilang bad ki nongrep ha ryngkat ka jingkyrshan ka Sorkar Meghalaya na bynta kiwei-kiwei ki mar, naduh ki soh, ki musli-musla bad kiwei-kiwei ki jingtyrwa ba kyrpang na ka Jylla.”
Ka Sorkar ka la ban jur ba kan ïai bteng ban kyrshan ïa ki nongrep bad ki kynhun nongrep na kiwei-kiwei ki bynta jong ka Jylla ban wanrah ïa ka ‘Standard Value Chain’, ban pyntikna ïa ka jingdap-jingbiang jong u soh sha ki nongthied ha Delhi.
Da ka jingdon jong ar kylla ka aïom Sohtrun hapoh ka Jylla, yn pyrshang ruh ban phah ïa u Sohtrun tlang naduh u Naiwieng haduh u Rymphang sha kylleng ka ri. Kane ka long kyrwoh na u Commissioner & Secretary ka tnad ka rep ka riang.
